Афғонистон ва Тожикистон чегарасида қуролли тўқнашув: бир киши ҳалок бўлган

Толибон кучлари ва Тожикистон чегарачилари ўртасида Бадахшон вилоятининг Шаҳр-Бузург тумани Давонг ҳудудида қуролли тўқнашув юз берди.

Якшанба куни содир бўлган тўқнашув бир нафар Толибон аъзосининг ўлими ҳамда тўрт кишининг яраланиши билан якунланди. Маҳаллий манбаларга кўра, тўқнашувнинг асосий сабаби – хитойлик кон қазиб олувчи компанияларнинг Тожикистон ҳудудига кириши ва Амударё ёқасига зарар етказиши ҳисобланади.

Маҳаллий манбаларнинг хабар беришича, Толибон кучлари кончилар билан бирга Давонг ҳудудига киргандан сўнг, Тожикистон чегарачилари томонидан қаттиқ қаршиликка учраган. Томонлар оғир қуроллар билан отишма қилган ва тарқалган видеоларда отишма овозлари эшитилади.

Манбаларнинг айтишича, Толибон ва Тожикистон расмийлари сешанба куни Бадахшон шаҳрининг чегара ҳудудида муаммони ҳал қилиш учун учрашган.

Учрашувда Толибон ва Тожикистон расмийлари бир-бирларини Афғонистон ва Тожикистонда мухолиф кучларга бошпана бериш ва ўқитишда, шунингдек дарё суви ва кон қазиб олиш масалаларида нотўғри ёндашувларда айблаган.

Бадахшондаги Толибон конлари раҳбари Шафиқуллоҳ Ҳофизи учрашувда Тожикистон томонининг 350 нафар қуролли мухолифат жангчисини тайёрлаётганини айтди.

Маълумот учун, Толибон ва Тожикистон муносабатлари 1990-йиллардан бери доимо таранг бўлиб келган. Тожикистон турли даврларда Толибон мухолифларини, айниқса Миллий қаршилик фронтини қўллаб-қувватлаб келган ва Аҳмад Масъуд ҳамда Амрулло Солеҳ каби шахсларга бошпана берган. Бу қўллаб-қувватлаш Толибоннинг назарича Афғонистоннинг ички ишларига тўғридан-тўғри аралашиш ҳисобланади.

Халқаро муносабатлар бўйича етакчи мутахассис доктор Саййид Муҳаммадтақий Ҳусайний ушбу низони Толибоннинг минтақавий даражадаги легитимлиги инқирозининг ифодаси сифатида баҳолаб, бундай тўқнашувлар давом этса, Марказий Осиёда янги хавфсизлик блоклари шаклланиши мумкинлиги ҳақида огоҳлантирди.