Кремль Трампнинг Путин ҳақидаги кескин баёнотларига вазминлик билан муносабат билдирди

Кремль АҚШ президенти Дональд Трампни Россия етакчиси Владимир Путин ҳақидаги сўзлари учун қаттиқ танқид қилишдан қочди ва уларни "эмоционал ортиқча юк" ифодаси деб атади.

Бу ҳақда Россия президенти матбуот котиби Дмитрий Песков Америка етакчисининг "Путин бутунлай ақлдан озган" ва Украина шаҳарларига кераксиз равишда оммавий зарбалар бераётгани ҳақидаги сўзларига изоҳ бераркан, маълум қилди.

Песковнинг сўзларига кўра, Трампнинг бундай эмоционал баёнотлари Москва ва Киев ўртасидаги музокара жараёнининг фаоллашуви билан боғлиқ бўлиши мумкин. "Биз барча реакцияларни диққат билан кузатиб борамиз ва шу билан бирга, президент Путин мамлакатимиз хавфсизлигини таъминлаш учун зарур деб ҳисоблаган қарорларни қабул қилади", — деди Песков.

Шунингдек, у Украина қуролли кучлари сўнгги пайтларда Россия ҳудудига йирик дрон ҳужумларини амалга ошираётганини, унга кўра, Москва жавоб беришга мажбур эканини таъкидлади.

Эслатиб ўтамиз, аввалроқ Дональд Трамп Путин ҳақида қаттиқ гапириб, унинг ҳаракатларидан ҳафсаласи пир бўлганини таъкидлаган эди:

"У кўп одамларни ўлдиради, Путин билан нима бўлганини билмайман. Мен уни узоқ вақтдан бери биламан, доим у билан тил топишаман, лекин у шаҳарларга ракеталар отиб, одамларни ўлдиради, бу менга умуман ёқмайди", деди у матбуотга берган изоҳида.

Трамп, шунингдек, Россияга қарши санксияларни кучайтириш имкониятини кўтариб чиқди ва кейинроқ Truth Social ижтимоий тармоғида Путин "бутунлай ақлдан озган" ва Украинани бутунлай эгаллашга интилаётганини айтган хабарни жойлаштирди. "Мен ҳар доим айтганман, у фақат бир қисмини эмас, бутун Украинани хоҳлайди ва эҳтимол бу ҳақиқат бўлиб чиқади. Лекин агар у шундай қилса, бу Россиянинг қулашига олиб келади", - дея қўшимча қилди Америка президенти.