Кремль: Отишмани шунчаки тўхтатиб бўлмайди

Кремлнинг таъкидлашича, АҚШ президенти Доналд Трамп жамоаси билан алоқалар “жуда яхши ривожланмоқда”, аммо ҳарбий ҳаракатларни тўхтатиш бўйича тез силжишни кутиш ҳали эрта. Бу ҳақда Россия президенти матбуот котиби Дмитрий Песков “Россия-1” телеканали эфирида маълум қилди.

“Албатта, ҳеч қандай зудлик билан натижа кутишнинг иложи йўқ”, деб таъкидлади Песков Жо Байденнинг аввалги маъмурияти даврида “икки томонлама муносабатларга етказилган зарарни” таъкидлаб.

Аввалроқ ўзини тинчликпарвар сифатида тарғиб қилаётган президент Трамп уруш давом этар экан, “даҳшатли ва маъносиз қирғинда жуда кўп – ҳафтада минглаб одамлар ҳалок бўлаётганини” таъкидлаб, Москвани “ишга киришишга” чақирган эди. У музокаралар "яхши кетаётганга ўхшайди", деб тан олди, лекин қўшимча қилди: "Шундай вақт келадики, сиз ё ҳаракат қилишингиз ёки гапиришни тўхтатишингиз керак".

Жума куни Трампнинг махсус вакили Стив Виткофф Санкт-Петербургда Владимир Путин билан тўрт соатдан ортиқ музокаралар ўтказди. Россия оммавий ахборот воситалари улар ўртасидаги қўл сиқиш суратини тарқатишди ва "Украина келишуви" муҳокама қилингани ҳақида хабар беришди.

Песков алоқалар бир вақтнинг ўзида бир нечта каналлар – Ташқи ишлар вазирлиги, разведка идоралари ва сармоявий эмиссари Кирилл Дмитриев орқали давом этаётганини тасдиқлади. Путин ва Трампнинг эҳтимолий учрашуви ҳақидаги саволга жавоб берар экан, у “томонлар биргаликда, сабр-тоқат билан бу йўлдан кетаётганини”, аммо “бунинг учун жиддий ва машаққатли меҳнат талаб этилишини” таъкидлади.