Кремль муваффақиятга умид қилмоқда

Россия президенти Владимир Путин Россия армияси йил охиригача Украина мудофаасини ёриб ўтиб, тўртта вилоят – Луганск, Донецк, Запорижя ва Херсон устидан назорат ўрнатишига ишончи комил. Бу ҳақда Bloomberg агентлиги Кремлга яқин манбаларга таяниб хабар берди.

Агентлик маълумотларига кўра, Путин узоқ давом этадиган урушга тайёр ва АҚШ томонидан санкциялар кучайишидан қўрқмайди. Бу унинг ўт очишни тўхтатиш ниятида эмаслигини ва АҚШ президенти Доналд Трампнинг 19-майга режалаштирилган телефон суҳбати чоғида ён беришни режалаштирмаганини англатади.

Шу билан бирга, Bloomberg'нинг Россия Мудофаа вазирлигига яқин манбаси Россия армияси ўз мақсадларига эриша олишига шубҳа билдирди. Унинг сўзларига кўра, Украина дронларининг ҳаракатлари кенг кўламли ҳужумларни жуда қиммат ва самарасиз қилади.

🗺 2025 йил май ҳолатига кўра, Россия армияси Украина ҳудудининг қарийб 20 фоизини назорат қилади . Бу қўлга олишларнинг деярли барчаси урушнинг биринчи ҳафталарида содир бўлган. Reuters агентлигининг Урушни ўрганиш институтига таяниб маълум қилишича, Россия деярли бутун Луганск вилоятини, шунингдек, Донецк, Запорожье ва Херсоннинг 70 фоизга яқин қисмини эгаллаб турибди.

Bloomberg ёзганидек, Путиннинг ён беришдан бош тортиши Трампни янги босим чораларини қўллаб-қувватлашга ундаши мумкин. Хусусан, гап Сенатда Россиядан нефт, газ, уран ва бошқа ресурсларни сотиб олувчи мамлакатлардан товарларга 500 фоизлик бож жорий этиш тўғрисидаги қонун лойиҳаси ҳақида бормоқда .

“ Биз қарийб икки ой давомида россияликларни [можарони ҳал қилишда] тараққиёт бўлмаса, бу содир бўлиши ҳақида қайта-қайта огоҳлантирдик ”, деди АҚШ Давлат котиби Марко Рубио 18-май куни CBS телеканалига берган интервюсида.