Колумбия президенти Трампнинг уни «наркобарон» деб атаган сўзларига кескин муносабат билдирди

Колумбия президенти Густаво Петро АҚШ президенти Дональд Трампнинг уни «наркобарон» деб атаган баёнотига кескин муносабат билдирди.

«Биламан, жаноб Трамп менинг кимлигимни, нима деб ўйлашимни ва бу мамлакат тарихи нимадан иборат эканини билмайди. У ҳатто Колумбия қаердалигини ҳам аниқ билмайди. Бу ерда кока етиштиришни ким кўпайтирди ва ким камайтирди? Наркокартелларга қарши урушни ким бошлади?» — деди Петро Боготадаги тарихий Боливар майдонида йиғилган минглаб тарафдорлари олдида.

Президентнинг сўзларига кўра, унинг ва оила аъзоларининг АҚШ санкциялар рўйхатига киритилиши ортида Колумбиядаги баъзи коррупционер бизнесменлар ва сиёсатчилар турибди. Улар, Петронинг таъкидлашича, Америкадаги ўта ўнг қанот кучларини Колумбия ва унинг раҳбариятига қарши санкциялар жорий этишга ундаётган экан.

«Жаноб Трамп, сиз ҳозир иттифоқчи деб атаётган одамлар — ҳақиқий Колумбия мафиясидир. Сизнинг иттифоқдошингиз — Очоа ва Пабло Эскобар картеллари муҳитида ўсган собиқ президент. Трамп эса гиёҳванд моддаларга қарши энг кенг кўламли курашни олиб борган етакчига ҳужум қилмоқда», — деди Колумбия раҳбари.

Петро АҚШда ҳеч қандай мулкка эгалик қилмаслигини таъкидлаб, қўшди:

«Мен ҳеч қачон бизнес билан шуғулланмаганман. АҚШда бир долларим ҳам, ҳисобим ҳам йўқ. Ҳозир ҳам, келажакда ҳам у ерда бизнес қилиш ниятим йўқ», — деди у.

АҚШ Колумбия президентини санкциялар рўйхатига киритди

Аввалроқ АҚШ Молия вазирлигининг Чет эл активларини назорат қилиш бошқармаси (OFAC) Густаво Петро, унинг турмуш ўртоғи Вероника дел Сокорро Алкосер Гарсия, ўғли Николас Петро ва ички ишлар вазири Армандо Бенедеттини «махсус тайинланган шахслар» рўйхатига киритгани ҳақида маълум қилинган эди.

АҚШ молия вазири Скотт Бессентнинг таъкидлашича, Петро ҳокимиятга келганидан буён Колумбияда кокаин ишлаб чиқариш сўнгги ўн йилликлардаги энг юқори даражага етган, президент эса гўёки наркокартеллар фаолиятини тўхтатишдан бош тортган.

Трамп Колумбия президентини танқид қилди

Дональд Трамп ўз навбатида Густаво Петрони «ноқонуний гиёҳванд моддалар савдосига алоқадор наркобарон» деб атади. Унинг сўзларига кўра, Вашингтон Колумбияга ажратиладиган барча тўловларни музлатган ва икки томонлама муносабатларни қайта кўриб чиқмоқда.