Ҳозирги глобаллашув даврида, инсон онги ва қалби учун кураш кучаяётган даврда турли ғоявий таҳдид ва хуружлар жамиятимизнинг манавий ҳаётига таъсир кўрсатишга уринишлари сони ортиб бормоқда. Бундай мураккаб вазиятда турли маънавий бузғунчиликлар, вайронкорлик ҳаракатларини олдини олиш, аҳоли, айниқса, ёшларимизда уларга нисбатан иммунитетни шакллантириш, эзгу ғояларни тарғиб қилишга алоҳида эътибор қаратиш зарур бўлади.
Олмазор туманидаги “Қорасарой” маҳалла фуқаролар йиғинида бунёд этилган янги кутубхона очилишига бағишлаб, “Китоб ва китобхонлик — инсон маънавияти кўзгуси” мавзусида маданий-маърифий кеча ташкил этилди. Тадбир Республика Маънавият ва маърифат маркази, Олий Мажлис ҳузуридаги жамоат фонди, “Маърифат” тарғиботчилар жамияти ҳамда туман ҳокимлиги ҳамкорлигида ўтказилди.
Унда олимлар, зиёлилар, болалар ёзувчилари, шоирлар, ел суйган санъаткорлар, нуроний отахон ва онахонлар, ёшлар иштирок этди. Тадбирда сўзга чиққанлар мамлакатимизда китобхонликка қаратилаётган еътибор, ёшларни китобга меҳрини ошириш борасидаги саъй-ҳаракатларга тўхталиб ўтиб, бунга ёшларимиз ҳам муносиб жавоб қайтараётганликларини эътироф этишди.
Жумладан, педагогика фанлари доктори, профессор, “Маърифат” тарғиботчилар жамияти аъзоси Ойниса Мусурманова маҳаллаларда бунёд етилаётган маърифат ўчоқлари-кутубхоналар аҳоли маънавий оламини янада бойитишга, фарзандларимизни езгу ғоялар асосида, китобга меҳрли етиб тарбиялашда яқиндан кўмак беришини эътироф этди ҳамда илмий, бадиий, шу билан бирга тарбиявий аҳамиятга ега бўлган 10 дан ортиқ турдаги китоблар жамланмасини кутубхонага совға қилди.
Тадбир баҳонасида Республика Маънавият ва маърифат маркази, “Маърифат” тарғиботчилар жамияти томонидан мазкур кўркам ва замонавий кутубхона фондига юзга яқин номдаги ўзбек ва жаҳон адабияёти дурдоналаридан иборат қарийб 1000 нуша бадиий китоблар совға қилинди.
Маданий-маърифий тадбирда “Маърифат” тарғиботчилар жамияти аъзолари, педагогика фанлари доктори, профессор Зуҳра Исмоилова, педагогика фанлари номзоди, доцент Мусаллам Aбдужабборова, Ўзбекистонда хизмат кўрсатган артист Алишер Отабоев, Муқумий номидаги Ўзбекистон давлат мусиқали театри актёри Расулхон Қодирхонов ва Бахтиёр Аҳмедов, кино актрисаси Ойдин Абдураҳмонова, Юнус Ражабий номидаги мақом ансамбли хонандалари Адолат Исмоилова ҳамда Рустам Мирминов, Ўзбекистон давлат Сатира театри актёри Шерзод Боймуродов иштирок етди. Уларнинг чиқишлари маданий-маърифий тадбирга кўтаринки кайфият бахш етди. Ўзбекистон Ёзувчилар уюшмаси аъзоси, шоир Дилшод Ражаб еса ўз ижодидан намуналар ўқиб берди.
Шунингдек, зиёлилар, олимлар тадбирлар давомида мамлакатимизда кезиб юрган янгиланиш нафаси, изчил ислоҳотлар ортида турган инсон манфаати, олиб борилаётган ободончилик ишлари ҳар бир юртдошимизнинг кўнглига кўчаётгани ҳақида алоҳида тўхталиб ўтишди.
— Маҳалламизда 1160 та хонадонда 7 607 нафар аҳоли вакиллари истиқомат қилади, дейди маҳалла фаоли Нигора Холматова. — Шундан 2000 нафардан ортиғи 16 ёшдан 30 ёшгача бўлган фуқаролардир. Шу маҳалланинг бир вакили сифатида биз яшаётган гўшада кутубхона ташкил етилганидан жуда хурсандман. Енди фарзандларимиз бўш вақтларини унумли ўтказиб, фойдали машғулот билан банд бўлишади.
— Севимли ижодкорим Худайберди Тўхтабоевнинг “Сариқ девни миниб” асари ҳам кутубхонамиздан жой олибди, — деди Иброҳим исмли болакай. — Бугун маҳалламизга кўп санъаткорлар, хонандалар келди. Кунимиз жуда мазмунли ва қизиқарли ўтди.
Маълумот ўрнида айтиш керакки, Олмазор туманидаги ўтказилиши белгиланган бу каби маънавий-маърифий тарғибот тадбирлари жорий йилнинг якунига 12 та йўналиш бўйича ташкил етилади. Шунингдек, 33 та турли маънавий-маърифий ва маданий тадбирлар доирасида 20 000 нафардан ортиқ аҳоли қамраб олинади. Туманда ташкил етилаётган ҳар бир тадбир давомида аҳоли кайфиятини кўтариш, ҳудудда ижтимоий-маънавий ҳолатни янада яхшилаш, ёшларни миллий қадриятлар асосида Ватанпарварлик руҳида тарбилашга алоҳида эътибор қаратилади.
"Маърифат" тарғиботчилар жамияти Ахборот хизмати
