Украина президенти ва Киев мэри ўртасидаги кескинлик яна авж олди: Владимир Зеленский Киев ҳокимиятини Россиянинг энергетика инфратузилмасига бераётган зарбаларига етарлича тайёргарлик кўрмаганликда айблади. Виталий Кличко эса давлат раҳбарига «манипуляция» ва «ёлғон» айбловлари билан жавоб қайтарди.
Конфликтнинг янги босқичига Россия ҳужумларидан сўнг электр энергияси, сув ва иссиқлик таъминотида юзага келган кенг кўламли узилишлар сабаб бўлди. Зеленскийнинг сўзларига кўра, айниқса Киевда вазият жуда оғир. У шаҳар ҳокимияти иситиш мавсумига тайёргарлик бўйича зарур қарорларни бажармаганини таъкидламоқда.
Кличко президентнинг эътирозларини рад этди. У Зеленский тилга олган йиғилишларга шаҳар маъмурияти вакиллари таклиф қилинмаганини кўрсатиб ўтди. Бундан ташқари, мэрнинг сўзларига кўра, марказий ҳокимият пойтахтда фавқулодда вазиятлар юзага келганда ҳаракат қилиш режасини тасдиқлашни пайсалга солиб келмоқда.
Шунингдек, Кличко Зеленскийнинг энергия таъминотидаги реал аҳволни қанчалик тушунишига шубҳа билдирди. Киев Украинанинг ягона энергетика тизимининг бир қисмидир, деб эслатди мэр: агар Россия зарбалари уни бутун мамлакат бўйлаб вайрон қилаётган бўлса, шаҳар ҳокимияти мустақил равишда үзлуксиз электр таъминотини таъминлай олмайди.
Икки сиёсатчи ўртасидаги низо бир неча йилдан бери давом этмоқда. Улар илгари ҳам бир-бирларини ваколатларга аралашишда ва етарлича ҳамкорлик қилмасликда бир неча бор айблашган.
Ўзбекистонда кескин совуқ ва кучли ёғингарчилик кутилмоқда
Эркинжон Турдимов бешта ректорни ишдан бўшатди
Актриса Нилуфар Ҳамидова 7 суткага қамалди
