"UzAuto Motors"нинг Chevrolet Cobalt автомобили Украинанинг Киев вилояти ҳуқуқ-тартибот идоралари ходимларининг танловига айланди. Бу ҳақда компания ахборот хизмати хабар берди.
Қайд этилишича, Украинадаги Chevrolet оммавий сегментининг расмий дистрибютори бўлган “Ravon Motors Ukraine” миллий полиция фаолиятида қулайликлар яратиш учун Cobalt автомобилларини етказиб берди.
Компания Киев вилояти полиция бошқармаси томонидан Cobalt сотиб олишда автомобилларнинг қулай нархи ва сифат борасидаги устунлиги асосий омиллар бўлганини таъкидлади.
"Украина Миллий полицияси ўз хизмат фаолиятида кўпгина турли автомобиль ишлаб чиқарувчиларнинг транспорт воситаларидан фойдаланади. Chevrolet Cobalt танлови ушбу автомобилнинг ўз сегментида юқори сифати ва ишончлилигининг яна бир тасдиғидир", дейилади хабарда.
Маълумот ўрнида ўтган йилнинг ноябрь ойида Қозоғистоннинг икки вилоятидаги полиция хизмати UzAuto Motors томонидан ишлаб чиқарилган Cobalt автомобилларини сотиб олган.
