Канаданинг Иммиграция, қочқинлар ва фуқаролик ишлари вазирлиги футбол бўйича Жаҳон чемпионатига ташриф буюришни режалаштираётган мухлисларнинг виза аризаларини кўриб чиқишда назоратни кучайтирди. Бу ҳақда Globe and Mail газетаси хабар бермоқда.
Нашрда таъкидланишича, мазкур чоралар чемпионат давомида бошпана сўровчилари сонининг кескин ошиб кетишининг олдини олиш мақсадида жорий этилган.
“Канада Иммиграция, қочқинлар ва фуқаролик ишлари вазирлиги футбол бўйича Жаҳон чемпионатига ташриф буюришни режалаштираётган мухлисларнинг виза аризаларини диққат билан кўриб чиқмоқда. Мақсад — мамлакатга бошпана сўраш ниятида кириб келиш ҳолатларининг олдини олиш”, дейилади мақолада.
Қайд этилишича, ҳатто ўйин чиптасини сотиб олган туристларга ҳам виза берилиши ёки мамлакатга киришга рухсат берилиши рад этилиши мумкин. Агар Канада расмийлари ушбу шахслар чемпионат якунлангач, ўз ватанига қайтмаслиги мумкин, деган хулосага келса, тегишли чоралар кўрилади.
Вазирлик вакили Изабель Дюбуа бу борада қуйидагича изоҳ берди:
“Иммиграция, қочқинлар ва фуқаролик ишлари вазирлиги ФИФА тадбирлари билан боғлиқ бўлиши мумкин бўлган бошпана сўровларини диққат билан кузатади. ФИФА мусобақалари бошпана олиш воситаси ҳисобланмайди”.
Маълумот учун, футбол бўйича 2026-йилги Жаҳон чемпионати 11-июндан 19-июльгача АҚШ, Канада ва Мексикада бўлиб ўтади. Турнир тарихда илк бор 48 та миллий терма жамоа иштирокида ташкил этилади.
Ўзбекистон Суперлигаси жаҳонда нечанчи ўринда туриши маълум
Роналду Жоржина Родригесга мурожаат қилди
УЕФА Россия терма жамоасининг бўлажак мусобақалардаги иштирокига ойдинлик киритди
