Камерун Президентининг қизи отасига овоз бермасликка чақирди

Камерун Республикасининг амалдаги президенти Пол Бийянинг ягона қизи Бренда Бийя ижтимоий тармоқдаги саҳифасида Камерун аҳолисини отасига овоз бермасликка чақирган.

Ижтимоий тармоқларда жойлаштирилган роликда у отаси учун овоз бермаслигини таъкидлаган. Шунингдек, у фуқароларни сайловларда Пол Бийяни қўллаб-қувватламасликка чақирди.

Бренда унда ота-онаси билан барча алоқаларни узганини, оиласи унга ёмон муносабатда бўлганини ва унинг ўлимини хоҳлаётганини айтган. Шунингдек, у одамларга сайловда 8 марта қатнашаётган 92 ёшли отаси Пол Бийяга овоз бермасликка чақирган.

Бундан ташқари, қиз амалдаги президент тарафдорлари, жумладан, яқин қариндошларидан келаётган таҳдидлар ҳақида гапириб, ўз хавфсизлигидан хавотирда эканини билдирди. Кейинчалик ролик унинг саҳифасидан олиб ташланганига қарамай, видео маҳаллий ва хорижий оммавий ахборот воситаларида тарқалишга улгурди.

Аввалроқ 92 ёшли Пол Бийя 12 октябрда бўлиб ўтадиган президентлик сайловларида иштирок этиши ҳақида расмий баёнот берганди.