Журналистлар энг кўп қайси минтақада ўлдирилаётгани маълум бўлди

ЮНЕСКОнинг ҳисоботига кўра, 2023 йил августидан 2025 йил майигача бўлган даврда жами 163 нафар журналист ҳалок бўлган. Улардан 109 нафари қуролли низолар ҳудудида ўз ҳаётидан айрилган. Энг кўп журналист ҳалок бўлган ҳудудлар сифатида Ғазо (46 нафар), Судан (13 нафар) ва Украина (8 нафар) қайд этилган. Шунингдек, ўлдирилганлар орасида 12 нафар аёл журналист ҳам бор.

БМТ Бош котиби Антониу Гутерриш бу вазиятни кескин қоралади. Унинг таъкидлашича, Ғазода журналистлар ўлими даражаси “жуда юқори” бўлиб, ҳар бир ҳолат юзасидан мустақил ва холис тергов ўтказилиши зарур. Шунингдек, Ғазо ҳудудига халқаро журналистларнинг киришига қўйилган тақиқ “қабул қилиб бўлмайдиган ҳолат” сифатида баҳоланди.

ЮНЕСКО маълумотларига кўра, зўравонлик фақат уруш ҳудудларида эмас, балки тинч давлатларда ҳам кузатилмоқда. Хусусан, Мексика хавфли ҳудудлардан бири сифатида қайд этилган — бу ерда 15 нафар оммавий ахборот воситалари ходими ҳалок бўлган. Айрим тинч минтақаларда журналистларга таҳдид даражаси ҳатто можароли ҳудудлардагидан ҳам юқори экани таъкидланган.

Минтақалар бўйича журналистларга қарши энг кўп зўравонлик ҳолатлари Араб давлатларида (82 ҳолат), Лотин Америкаси ва Кариб ҳавзасида (34 ҳолат), Осиё–Тинч океани минтақасида (30 ҳолат), Европа ва Шимолий Америкада (12 ҳолат) ҳамда Африкада (5 ҳолат) қайд этилган.

БМТ Бош котиби ўз баёнотида: “Журналистлар сукут сақлашга мажбур қилинганда, бутун жамият ўз овозини йўқотади”, — дея таъкидлаган. У халқаро ҳамжамиятни журналистларни ҳимоя қилиш ва уларга қарши жиноятларни жазолаш чораларини кучайтиришга чақирган.