Жиззахда қўлланилаётган ёмғирлатиб суғориш технологиясининг афзалликлари нимада?

Сув хўжалиги вазирлиги ташаббуси билан Жиззах вилояти Зомин туманига Оммавий ахборот воситалари ходимлари учун пресс-тур ташкиллаштирилди. Унда сувни тежаш бўйича амалга оширилаётган ишлар ҳақида маълумотлар берилди.

Илк объект чорвачилик кластери бўлди. Ушбу кластер чорваларни доимий озуқа билан таъминлаш мақсадида экин экади. Бироқ улар сув муаммосига дуч келган. Шундан сўнг муаммога ечим сифатида ёмғирлатиб суғориш технологияси (CENTER PIVOT) Америкадан олиб келинган.

Жиззах вилояти Зомин туманидаги Даштобод шаҳри яқинида фаолият юритаётган чорвачиликка ихтисослашган “Жиззах органик” чорвачилик кластерида ёмғирлатиб суғоришнинг “Кенг қамровли” (CENTER PIVOT) тизими орқали суғориш йўлга қўйилган.

Айни пайтда 600 гектар беда майдонлари ушбу технология орқали суғорилмоқда. Умумий ҳисобда 3 та объектда 1300 гектар майдонга 23 та ёмғирлатиб суғориш технологилари мавжуд. Жорий йили умумий ҳисобда 60-70%гача сув тежалди. Ушбу ўрнатилган технология 405 метрлик бўлиб, секундига 82 литр сув сарфлайди. Ҳар бир пуркагичлар ораси 50 см.дан 1 метргача бўлади, шуyга қараб сув сарфи ортиб бораверади. Ушбу технология компютерлаштирилган ернинг намлиги ҳисобга олинган ҳолда, сув миқдори белгиланади.

Афзалликлари: сув тежалиши – 35-40 % гача, қўл меҳнати (сувчиларга бўлган талаб) 90 % гача, минерал ўғитлар 25-30 % гача тежалади, фойдаланиш муддати – 15-20 йил.

Камчиликлари: нотекис ва инфраструктура (электр узатиш столбалари, коллекторлар) бўлган майдонда жорий этишда қийинчиликлар юзага келади. Экинлар радиал суғорилади, атрофда 22% ер суғорилмасдан қолиб кетади. Суғорилмай қолган бурчак ер майдонларини суғориш учун қўшимча ускуна (пушка) ўрнатиш талаб этилади.

Импорт/экспорт: АҚШ, Туркия, Испания ва Хитойдан импорт қилинади, хозирда 1 та маҳаллий ишлаб чиқарувчи корхона ишга туширилган (2022 йилда).