2025 йилда Африканинг энг яхши футбол ҳаками деб топилган сомалилик рефери Омар Артанга АҚШга киришга рухсат берилмади. ФИФА томонидан 2026 йилги жаҳон чемпионатида ишлайдиган ҳакамлар рўйхатига киритилган мутахассис Майами аэропортида чегара назоратидан ўта олмаган.
Reuters агентлигининг хабар беришича, қарор ўтган ҳафта охирида қабул қилинган. Омар Артан АҚШга етиб келганидан сўнг мамлакатга кириш ҳуқуқидан маҳрум қилинган ва чегара хизмати томонидан орқага қайтарилган.
ФИФА ушбу ҳолат бўйича изоҳ бериб, қабул қилувчи давлатнинг миграция ва виза масалаларига аралашмаслигини маълум қилди.
«ФИФА мезбон мамлакатнинг иммиграция тартиб-таомилларида, жумладан виза масалаларида иштирок этмайди. Ваколатли идоралар бизга жаноб Артаннинг мақоми ҳозирча қайта кўриб чиқилмаслигини маълум қилди», деди федерация вакили.
АҚШ Божхона ва чегара хизмати ҳам бу воқеани тасдиқлаган. Бироқ идора баёнотида ҳакамнинг исми очиқланмаган ва мамлакатга кириш рад этилганининг аниқ сабаблари келтирилмаган. Фақат Майами аэропортига келган Сомали фуқаросига кириш тақиқлангани маълум қилинган.
Омар Артан эса вазиятга қарамай, фаолиятини давом эттириш ниятида эканини билдирди. У ўзини қўллаб-қувватлаган футбол жамоатчилигига миннатдорлик изҳор қилди ва ҳамкасбларига жаҳон чемпионатида омад тилади.
Омар Артан жаҳон чемпионати финал босқичи ўйинларига жалб қилинган биринчи сомалилик рефери сифатида ҳам тарихга кирган.
Кузатувчиларнинг фикрича, мазкур қарор спорт ва миграция сиёсати кесишган нуқтада юзага келган баҳсли ҳолатлардан бири бўлиб, жаҳон чемпионати олдидан катта муҳокамаларга сабаб бўлиши мумкин.
Ўзбек футболчиларининг ўйиндан кейин қилган иши канадаликларни ҳайратга солди!
Миллион россиялик мамлакатни тарк этди
Ўзбекистон – Нидерландия ўртоқлик ўйини Нью-Йоркда бўлиб ўтади
