Жанубий Корея мудофаа вазирлиги денгиз қароқчиларига қарши курашадиган “Чхонхэ” бўлинмаси фаолият ҳудудини Ҳўрмуз бўғозига яқинроқ сувларгача кенгайтириш режасини маълум қилди. Reuters'нинг ёзишича, бу қарор АҚШ президенти Доналд Трамп Сеулдан Эронга қарши урушни қўллаб-қувватлашни талаб қилганидан кейин қабул қилинди.
Ҳукумат бўлинманинг 2026 йил охирида тугайдиган мандатини узайтириш бўйича парламентга таклиф киритади. Бунинг учун таклифни аввал Жанубий Корея президенти Ли Чже Мён маъқуллаши керак. Режага кўра, бўлинма Адaн кўрфазидан Ўмон яқинидаги сувларгача ҳаракат қилади. Бу ҳудуд Ҳўрмуз бўғозидан қарийб 650 километр узоқликда жойлашган. Шунингдек, Сеул минтақага денгиз патрул самолётини ҳам юборади ва бўлинма таркибини 75 кишига кўпайтиради.
“Чхонхэ” бўлинмаси 2009 йилдан буён Аден кўрфазида тижорат кемалари хавфсизлигини таъминлаб келади. Ҳозир унинг таркибида 4400 тонналик эсминец, вертолёт, учтагача тезюрар қайиқ ва 300 га яқин ҳарбий хизматчи бор. Мудофаа вазирлиги миссия жанговар бўлмаслигини ва бўлинма иттифоқчи кучлардан мустақил ҳаракат қилишини таъкидлади.
Трамп Сеулни Эрон урушини етарлича қўллаб-қувватламаётганликда танқид қилиб, ёзда икки давлатнинг йирик қўшма ҳарбий машқларини қисқартирганди. Жанубий Кореянинг ўзи эса нефтининг 70 фоизини Яқин Шарқдан олади.
"Майли мени ўлдиришсин. Лекин... "
Актриса Нилуфар Ҳамидова 7 суткага қамалди
Ўзбекистонда кескин совуқ ва кучли ёғингарчилик кутилмоқда
