Истанбул прокуратураси Туркияда бугун, 28 май куни бўлиб ўтаётган президентлик сайловларининг иккинчи босқичи ҳақида ёлғон маълумот тарқатиш бўйича тергов доирасида беш нафар гумонланувчини ҳибсга олишга ордер берди. Бу ҳақда TRT телеканали хабар қилди.
“Истанбул Республика прокуратураси жамоатчиликни чалғитиш ва жамоат тартибини бузиш мақсадида ижтимоий тармоқларда президентлик сайловларининг иккинчи босқичига оид провокацион маълумотлар тарқатилгани юзасидан расмий тергов бошлади. Бугунги кунга қадар ушбу иш бўйича тергов ҳаракатлари доирасида беш нафар гумонланувчини ҳибсга олиш тўғрисида қарор қабул қилинди”, дейилган прокуратура баёнотида.
Истанбул полициясининг маълум қилишича, умуман олганда, овоз бериш жараёни муаммосиз ва жиддий ҳодисаларсиз ўтмоқда. Маҳаллий оммавий ахборот воситаларида айрим сайлов участкаларида сайловчилар ўртасида ўзаро тўқнашувлар бўлаётгани ҳақида хабарлар бор, бироқ улар кенг тарқалмаган.
Овоз бериш жараёни соат 17:00 да (Тошкент вақти билан 19:00 да) якунланади. Сайловнинг дастлабки натижалари бир неча соат ичида маълум бўлиши кутилмоқда.
