Фаластиннинг ҲАМАС ҳаракати Сиёсий бюроси раҳбари Исмоил Ҳаниянинг ўлими муносабати билан Тель-Авивдаги республика элчихонаси биноси устида Туркия байроғи ярмига туширилди. Бунга жавобан Исроил ташқи ишлар вазири Исроил Кац Туркия элчиси ўринбосарини ташқи ишлар вазирлигига чақириб, норозилик билдирган.
"Ҳамас етакчиси Исмоил Ҳания ўлдирилиши ортидан Тель-Авивдаги Туркия элчихонасида Туркия байроғи ярим штатга туширилганидан кейин Туркиянинг Исроилдаги элчиси ўринбосарига қаттиқ танбеҳ бериш учун чақиришни буюрдим", — деб ёзди Кац ўзининг ижтимоий тармоғида.
Унинг сўзларига кўра, Исроил "Исмоил Ҳания каби қотил учун мотам тутишга алоқадорлик ифодаларига тоқат қилмайди".
"Агар элчихона ходимлари мотам тутмоқчи бўлса, Туркияга бориб, Хамас террор ташкилотини қўллаб-қувватловчи ва унинг қотилликлари ва ваҳшийликларини маъқуллайдиган хўжайини Туркия Президенти Таййип Эрдоған билан бирга мотам тутсин", — дея қўшимча қилди Кац.
Исроил ва Туркия ўртасидаги муносабатлар 2023 йил октябрь ойида бошланган Фаластин-Исроил можароси авж олганидан кейин кескин ёмонлашди. Томонлар бир неча бор кескин баёнотлар ва ўзаро айбловлар билан алмашган. 2023 йил октябрь ойи охирида Исроил ТИВ "Исроил-Туркия муносабатларини қайта кўриб чиқиш учун" дипломатларни Анқарадан чақириб олганини эълон қилди. Туркия ҳам Тель-Авивдаги элчисини маслаҳатлашувлар учун чақириб олди.
