Исроил сунъий интеллектга таъсир ўтказиш учун сохта таҳлил марказини ташкил этган

Исроил материаллари сунъий интеллект чат-ботларининг жавобларига таъсир ўтказишда қўлланиши мумкин бўлган сохта таҳлил марказини ташкил этган. Бу ҳақда Responsible Statecraft хабар берди.

Гап ўзини Америка тадқиқот маркази сифатида тақдим этадиган ва Исроил ҳамда Фаластин ҳақида материаллар эълон қиладиган Hanover Institute for Public Policy ҳақида бормоқда. Бироқ нашр аниқлашича, у мустақил таҳлилий ташкилот эмас.

Лойиҳа сайтида қайд этилишича, у Исроил ҳукуматининг давлат реклама агентлиги буюртмаси асосида Piro Inc. компанияси томонидан ташкил этилган. Piro компанияси асосчиларидан бири Спайк Лининг «Не пойман — не вор» фильми продюсери Дэниел Розенберг ҳисобланади.

6 августдан бери Hanover Institute Исроил-Фаластин можаросига бағишланган 100 дан ортиқ материал эълон қилди. Улар орасида 1948 йилда фаластинликларнинг кўчирилиши сабаблари ва Ғазо секторидаги ҳозирги вазият ҳақидаги мақолалар ҳам бор.

Responsible Statecraft ушбу материалларнинг расмийлаштирилишига эътибор қаратмоқда: уларда ҳаволалар, статистика, мундарижа мавжуд бўлиб, материаллар нейтрал услубда ёзилган. Бундай тузилиш катта тил моделларининг ушбу материалларни ишончли манбалар сифатида қабул қилиш эҳтимолини ошириши мумкин.

Piro компаниясининг ўзи мижозларга AI Story Optimization — «сунъий интеллект учун ҳикояларни оптималлаштириш» деб номланган хизматни таклиф қилади. Компания катта тил моделлари ахборотнинг ишончлилигини қандай баҳолашини ҳисобга олган ҳолда контент яратишини таъкидлайди.

NewsGuard таҳлилчиси Элис Лининг фикрича, бундай сайтлар қидирув тизимлари ва чат-ботлар орқали Америка аудиториясига ахборот тарқатишга мўлжалланган бўлиши мумкин. Унинг сўзларига кўра, Hanover Institute нейтрал ном ва сайт тузилишидан тортиб, Америка байроғи рангларидаги дизайнгача одатий Америка таҳлил маркази кўринишини тақлид қилади.

Институтнинг ўзи академик ва тақриздан ўтган тадқиқотларга таянишини билдирмоқда. Бироқ Responsible Statecraft маълумотларига кўра, унинг материалларида мунтазам равишда Исроил ҳукумати, жумладан, армия ва Ташқи ишлар вазирлиги материалларидан фойдаланилади.

Нашр, шунингдек, Piro компанияси ўз фаолияти учун Исроил ҳукуматидан 900 минг доллар олганини хабар қилди. Шартнома Франциянинг Havas Media реклама-коммуникация гуруҳи орқали амалга оширилмоқда.