Исроил матбуоти: Трамп Нетаняхуни таҳқирлади

Исроил Бош вазирининг Вашингтонга ташрифи ҳам дипломатик, ҳам рамзий жиҳатдан муваффақиятсиз якунланди. Иккала томоннинг баёнотлари ва матбуотга сиздирилган тасвирлар Нетаняхунинг кутганлари амалга ошмаганини аниқ кўрсатди. Бу ҳақда Исроилнинг етакчи оммавий ахборот воситалари очиқ ёзмоқда.

Эслатиб ўтамиз, 7 апрел куни Оқ уйда АҚШ президенти Доналд Трамп ва Исроил бош вазири Бинямин Нетаняху ўртасида учрашув бўлиб ўтган эди. Ғазода ўт очишни тўхтатиш, Эрон ядро дастури, Туркиянинг Суриядаги ҳарбий иштироки ва икки давлат ўртасидаги савдо алоқалари муҳокама қилинди.

▪️ Нетаняху Туркиянинг Суриядаги таъсиридан норозилигини билдирди , бироқ Трампдан аниқ жавоб олмади. Аксинча, Америка етакчиси Туркия президентини олқишлади ва Исроил Туркия билан ҳар қандай муаммоларни ҳал қилиш учун оқилона ҳаракат қилиши кераклигини таъкидлади.

▪️ Нетаняху ташрифдан тарифларни бекор қилиш ёки пасайтириш кўринишидаги натижалар билан қайтишини кутган , бироқ Оқ уйни ҳеч нарсасиз тарк этган. Трамп 17 фоизлик тарифларни пасайтириш талабини рад этди ва Исроил ҳар йили АҚШдан 4 миллиард доллар ёрдам олишини эслатди.

Қизиғи шундаки, Исроил тарифларни жорий этишдан олдин АҚШ импортига қўйилган қолган тарифларни бекор қилган эди, аммо бу Трампни жавоб тарифларини жорий этишдан тўхтата олмади.

▪️ Нетаняхунинг савдо тақчиллигини бартараф этиш ҳақидаги ваъдалари ва Эронга нисбатан кескин позицияни эгаллаш талаблари жавобсиз қолди. Бундан ташқари, Трамп Эрон билан тўғридан-тўғри музокаралар олиб борилишини эълон қилиб, ҳарбий ҳаракатлардан кўра Теҳрон билан келишувга эришиш афзалроқ эканини таъкидлади.

Walla мухбири Барак Равид учрашувни "бутунлай муваффақияцизлик" деб атаган бўлса, "Maariv" шарҳловчиси Анна Барский матбуот анжуманини умидсизлик деб таърифлаб, Трампнинг тарифлар бўйича жавоби "хўрлик билан чегараланганини" таъкидлади.