Исроил билан боғлиқ хакерлар Эрон криптобиржасидан $90 миллион ўғирлади

Эроннинг энг йирик криптовалюта биржаси Nobitex янги киберҳужумга учради: 90 миллион долларлик криптовалюта ноқонуний йўл билан биржанинг рақамли ҳамёнларидан чиқариб юборилди. Ҳужум учун жавобгарликни ўзини Gonjeshke Darande ("Ёввойи чумчуқ") деб атаган хакерлар гуруҳи зиммасига олди. Уларнинг айтишича, Nobitex Эрон ҳукуматига халқаро санкцияларни четлаб ўтишда ва ташқи террористик фаолиятни молиялаштиришда ёрдам берган.

Гуруҳ ижтимоий тармоқларда шундай баёнот берди:

"Nobitex — режимнинг терроризмни молиялаштиришдаги асосий қуроли. Кимки бу инфратузилмага боғлиқ бўлса, ўз бойлигини хавф остига қўяди."

Elliptic киберхавфсизлик компанияси таҳлилига кўра, хакерлар криптовалюта маблағларини шундай манзилларга йўллаганки, у ердан уларни ҳатто ўғрилари ҳам қайтара олмайди — амалда пуллар "ёқиб юборилган".

Манзиллардан бири ҳатто очиқ таҳдид бўлиб, унда шундай ном бор: "F*ckIRGCterrorists". Бу IRGC — яъни Эрон Исломий инқилоб қўриқчилари корпуси (КСИР)га қарши йўналтирилган. Ушбу ҳарбий тузилма кўпинча Эрон режимининг ташқи ҳарбий амалиётларида иштирок этувчи асосий куч сифатида тилга олинади.