Исроил АҚШга Ғазо бўйича режа юзасидан эътироз билдирди

Исроил бош вазири Бинямин Нетаняҳунинг идораси 3 август куни АҚШга Ғазо бўйича режа юзасидан хавотирларини етказганини маълум қилди. Қўшма Штатлар президенти Доналд Трамп ҲАМАС қуролсизланишга рози бўлганидан кейин ушбу режани олқишлаган эди.

"Исроил таклиф этилган режа бўйича ўз мулоҳазалари ва хавотирларини америкалик ҳамкорларига етказди. Жамоатчиликка эълон қилинган вариант Исроилнинг позициясини акс эттирмайди", — деди Исроил бош вазиро идораси матбуот котиби Дорон Спилман.

Унинг таъкидлашича, Исроил разведкаси ҲАМАС 2025 йил октябр ойида Трамп томонидан эълон қилинган оташкесимдан бери қайта қуролланаётгани ва куч тўплаётганини аниқлаган. Ушбу оташкесим ҳудудда зўравонлик даражасини камайтирган бўлса-да, Исроил зарбалар беришда давом этмоқда.

ҲАМАС 31 июл куни келишувнинг кейинги босқичига рози бўлганини эълон қилди. Ушбу босқич қуролларни янги тузилаётган Фаластин бошқарув қўмитасига топширишни ўз ичига олади. Трамп бу қадамни 2023 йил 7 октябрда ҲАМАСнинг Исроилга ҳужуми билан бошланган вайронкор урушни тугатиш йўлидаги муҳим босқич деб атади. У журналистларга Исроил бу ўзгаришлардан жуда хурсанд эканини айтди.

Бироқ Нетаняҳунинг матбуот котиби ҲАМАСнинг ҳаракатлари гуруҳ “7 октябр услубидаги янги қирғинларга тайёрланаётганини кўрсатаётгани”ни билдирди. У Трампнинг Тинчлик кенгаши томонидан эълон қилинган режада Ғазо қўшниларига таҳдид солмайдиган, дерадикализация қилинган ва терроризмдан холи ҳудуд бўлиши талаб қилинганини эслатиб ўтди.

"Тўлиқ қуролсизланишсиз амалга оширилган ҳар қандай нарса ҲАМАСга Исроилга яна таҳдид солиш имкониятини қолдиради", — деб қўшимча қилди у.