Испанияда хлор омбори ёнғин чиқди

Испаниянинг Каталония провинциясида жойлашган Clim Waterpool кимёвий омборида содир бўлган ёнғин сабаб бешта ҳудудда фавқулодда ҳолат эълон қилинди.

Ёнғин маҳаллий вақт билан соат 02:20 да бошланиб, сузиш ҳавзалари учун мўлжалланган 70 тонна хлор сақланадиган ҳудудда рўй берган. Воқеа жойи яқинидаги аҳоли пунктлари дарҳол хавфсизлик чораларини кўришга чақирилган.

Ёнғинни бартараф этишга 60 нафар ўт ўчирувчи, 20 нафар махсус мутахассис, жумладан кимёвий разведка ва технологик хавфларга қарши ишлайдиган гуруҳлар жалб этилган.

Ҳозирча жабрланганлар ҳақида расмий маълумот йўқ.

Шунга қарамай, воқеа жойига қўшимча фавқулодда ёрдам бригадалари етказилган ва хавфсизликни таъминлаш мақсадида айрим йўлларда ҳаракат чекланган.

“Ёнғиннинг бошқа омборларга тарқалишига йўл қўймадик. Энди асосий эътибор тутун шлейфининг заҳарлилик даражаси ва тарқалишини назорат қилишга қаратилган”, — дея изоҳ берди Каталония ўт ўчириш хизмати вакиллари.