Испания Европа Иттифоқига аъзо бўлмаганлар учун 100 фоиз мулк солиғини жорий этишни режалаштирмоқда

Испания расмийлари Европа Иттифоқига аъзо бўлмаганларга кўчмас мулк сотиб олиш учун 100 фоиз солиқ жорий этишни режалаштирмоқда.

Бу ҳақда Financial Times нашри ёзмоқда.

Ушбу чора бош вазир Педро Санчес томонидан тақдим этилган уй-жой инқирозини бартараф этиш ва маҳаллий аҳоли учун арзон уй-жой билан таъминлашга қаратилган режанинг бир қисмидир.

Санчеснинг таъкидлашича, Европа Иттифоқига аъзо бўлмаганлар Испанияда ҳар йили 27,000 турар-жой мулкларини, асосан, "спекулятив мақсадларда" сотиб олишади.

Испания кўчмас мулк нархлари ошиб бораётган ва янги қурилиш талабдан анча орқада қолаётган бир пайтда сотиб олиш ёки ижарага олиш учун арзон уйларни топиш қийинлигидан аҳолининг норозилиги кучайиб бораётган Европа мамлакатлари қаторига киради.

Испан мулки дам олиш уйларини сотиб олувчи ёки иссиқроқ иқлими бўлган мамлакатга кўчиб ўтмоқчи бўлган одамлар орасида юқори талабга эга.

Бундай харидлар аллақачон бир қатор солиқларга тортилади, уларнинг миқдори минтақага, шунингдек, битим бирламчи ёки иккиламчи бозорда амалга оширилганлигига боғлиқ. Бу солиқлар биргаликда 7% дан 12% гача бўлади.