Иситиш мавсумида эҳтиёжманд оилаларга 1 млн сўм миқдорида бир марталик ёрдам берилади

2025/2026 йилги иситиш мавсумида эҳтиёжманд аҳолини қўллаб-қувватлаш мақсадида жорий йил ноябрь ойида 1 млн сўм миқдорида бир марталик моддий ёрдам берилади.

Бу ҳақда Ижтимоий ҳимоя миллий агентлиги Ахборот хизмати маълум қилди.

Ёрдамни қуйидагилар олади:

• “Ижтимоий ҳимоя ягона реестри” орқали болалар нафақаси ёки моддий ёрдам олувчи оилалар;
• “Камбағал оилалар реестри”даги оилалар;
• “Маҳалла еттилиги” томонидан шакллантирилган қўшимча рўйхатга киритилган оилалар.

Қўшимча рўйхатга қуйидаги тоифадаги оилалар устувор тартибда киритилади:

• боқувчисини йўқотган;
• I ёки II гуруҳ ногирони бўлган аъзоси бор;
• ногиронлиги бўлган болани парваришлаётган;
• иситиш тизими мавжуд бўлмаган кўп қаватли уйларда яшовчи;
• 3 ва ундан ортиқ оила бир хонадонда яшовчи;
• оғир хасталикка чалинган беморни парваришлаётган;
• ёлғиз кекса ёки ногиронлиги бор фуқаролар.

Агар сиз шундай тоифага мансуб бўлсангиз, жорий йил 25-сентябрга қадар “Маҳалла еттилиги”га мурожаат қилинг.