Илон Маск 2022 йил охиридан бери Владимир Путин билан мунтазам алоқада бўлган

Илон Маск 2022 йил охиридан бери Владимир Путин билан мунтазам алоқада бўлган — The Wall Street Journal

Бу маълумот АҚШ, Европа Иттифоқи ва Россиянинг бир қанча амалдаги ва собиқ амалдорлари томонидан тасдиқланган. Маск ва Путин ўртасидаги музокаралар “шахсий мавзулар, бизнес ва геосиёсий зиддиятлар” ҳақида бўлган, деб ёзади WSJ.

Бундан ташқари, 2022 йилдан кейин Маск бир нечта юқори мартабали россиялик амалдорлар билан ҳам мулоқот қилган, улар орасида Россия президенти маъмурияти раҳбари Сергей Кириенко ҳам бор. Улар нима ҳақида гаплашгани номаълум.

2022 йилнинг кузида сиёсатшунос Ян Бреммер Маск унга Путин билан суҳбати ва Кремлнинг “қизил чизиқлари” ҳақида гапирганини айтганди. Бреммернинг сўзларига кўра, Маск унга Россия ҳар қандай ҳолатда ҳам Қрим ва Украинанинг бетарафлигини сақлаб қолиши ва Украинанинг аннексия қилинган Қримга бостириб киришига ядровий зарба билан жавоб бериши ҳақидаги хабарни етказган. Маск Бреммерга бу гапларни айтганини рад этди.

Нашр маълумотларига кўра, 2023 йил охирида Кремл биринчи марта Маскга Тайван устидан Starlink сунъий йўлдош алоқа терминалларини фаоллаштирмаслик илтимоси билан мурожаат қилган – бундан мақсад эса Хитой етакчиси Си Жинпинга хайрихоҳликни намойиш этиш бўлган.

"АҚШ ва унинг иттифоқчилари сўнгги йилларда Путинни изоляция қилишди. Маскнинг бу мулоқоти Россия етакчиси билан ҳамкорликнинг янгиланганини кўрсатиши ва Трампнинг Украинадаги уруш каби йирик келишмовчиликлар бўйича келишувга эришиш истагини яна бир бор тасдиқлаши мумкин", дейилади хабарда.