Илҳом Алиев Владимир Путин томонидан ташкиллаштирилган саммитга боришни рад этди

Озарбойжон президенти Илҳом Алиев Санкт Петербург шаҳрида бўлиб ўтаётган МДҲ давлат раҳбарларининг норасмий саммитида қатнашмади. Бу ҳақда президент администрациясига таяниб AzerTAJ хабар берди.

Озарбойжон президенти администрациясига кўра, Илҳом Алиев 21 декабр куни бўлиб ўтган Олий Евросиё иқтисодий кенгаши йиғилишида ҳам қатнашмаган. Чунки Озарбойжон Евросиё иқтисодий иттифоқи аъзоси ҳисобланмайди. Шунингдек, Алиев “иш жадвали жуда тиғиз бўлгани” сабабли МДҲ давлатлари раҳбарларининг норасмий саммитида иштирок этмайди.

​Москва ва Боку ўртасидаги муносабатлар 2024 йил декабрда Azerbaijan Airlines авиакомпаниясининг самолёти Оқтовда ҳалокатга учраб, 38 киши ҳалок бўлганидан кейин кескинлашди. 2025 йилнинг ёзида Екатеринбургда Озарбойжоннинг бир нечта фуқароси қўлга олинди, улардан икки нафари вафот этди. Бунга жавобан Озарбойжонда Россия фуқаролари, жумладан, “Спутник Озарбойжон” ходимлари ҳибсга олинди.

Путин 2024 йил декабр ойида Озарбойжон самолёти билан содир бўлган воқеа учун Алиевдан узр сўраган ва лайнер “Украина дронлари ҳужуми сабабли қўнганини” даъво қилган. Озарбойжон президенти эса ҳалокат учун жавобгарликни “Россия вакиллари”га юклади ва айбдорларни жазолашни талаб қилди.