Ҳусановнинг собиқ жамоадоши: "У юқори даражада ўйнашини ҳаммамиз билардик, аммо..."

Беларуснинг "Энергетик-БГУ" клубида Абдуқодир Ҳусанов билан бирга тўп тепган собиқ дарвозабон Артём Макавчик ўзбекистонлик ҳимоячининг салоҳияти ҳақида фикр билдирди.

Жорий йил 26 ёшида футболчилик фаолиятини якунлаган Макавчик Ҳусановнинг "Манчестер Сити" даражасига кўтарилишида "Энергетик-БГУ"даги фаолияти ва мураббий Анатолий Юревичнинг ҳам ҳиссаси борлигини таъкидлади.

"Абдуқодир юқори даражада ўйнашини ҳаммамиз билардик. Аммо бунчалик юқори даражага кўтарилишини кутмагандик... У учун жуда хурсандман!

Унинг жуда кучли футболчи экани ўшандаёқ кўриниб турарди. Анатолий Ивановичнинг у билан олиб борган ишлари ҳам ўз самарасини берди.

Бундан ташқари, Ўзбекистон ёшлар ўртасидаги жаҳон чемпионатида жуда яхши иштирок этди. Шундан кейин, адашмасам, Ҳусанов дарҳол миллий терма жамоага чақирилди ва у ерда ҳам ўзини яхши кўрсатди. Мана шу омилларнинг барчаси бирлашиб, ҳозирги натижага олиб келди", – деди Макавчик.

Эслатиб ўтамиз, 22 ёшли Абдуқодир Ҳусанов 2023 йил ёзида Беларуснинг "Энергетик-БГУ" клубидан Франциянинг "Ланс" жамоасига ўтган. 2025 йил январь ойида эса Англиянинг "Манчестер Сити" клуби футболчисига айланган.