Ҳамюртимиз Таиланддаги турнирнинг 1/4 финалига чиқди

Таиланднинг Нонтхабури шаҳрида теннис бўйича "Челленжер" туркумига кирувчи турнир бўлиб ўтмоқда.

Мукофот жамғармаси 100 000 АҚШ долларини ташкил этувчи мусобақада ҳамюртимиз Ҳумоюн Султонов ҳам муваффақиятли одимлаяпти. Мамлакатимизнинг биринчи ракеткаси илк даврада турнирда олтинчи рақам остида таснифланган қозоғистонлик Тимофей Скатовни тай-брекларда 7/6(4), 7/6(6) ҳисобида мағлубиятга учратганди.

Бироз аввал теннисчимиз 1/8 финал учрашувини ўтказди. Султоновга бу сафар япониялик Ҳироки Мория рақиблик қилди. Саралашдан асосий тўрга етиб келган Мория 1/16 финалда рейтингда ўзидан 119 поғона юқорида бораётган франциялик Жёффри Бланканексни 7/5, 7/5 ҳисобида таслим этганди.

Ҳумоюн 1 соату 12 дақиқа давом этган баҳсда ортиқча қийинчиликсиз япониялик рақиби устидан ғалабага эришди - 6/4, 6/2. Бу теннисчиларнинг ўзаро ўтказган илк учрашуви эди.

Таққослаш учун, Султонов ATP рейтингида 223, Скатов 191, Мория эса 398-ўринни эгаллаб турибди. Ҳумоюн чорак финалда чехиялик Далибор Сврчина ҳамда турнирнинг иккинчи ракеткаси франциялик Грегор Баррер учрашуви ғолибига қарши кортга чиқади.