Гвардиола бир юлдуздан воз кечди

Хорватиялик ярим ҳимоячи Матео Ковачич яқин вақтлар ичида "Манчестер Сити"ни тарк этиши мумкин. Бу ҳақда Caught Offside журналистлари хабар бермоқда.

Манбага кўра, 31 ёшли ярим ҳимоячининг трансферига Премьер-лиганинг икки вакили қизиқиш билдирмоқда. Гап Лондоннинг "Вест Хэм" ва Бирмингемнинг "Астон Вилла" клублари ҳақида кетмоқда.

Матеонинг "шаҳарликлар" билан амалдаги меҳнат шартномаси 2027 йилнинг ёзида якунига етади.

Ярим ҳимоячи 2023 йилнинг ёзида "Манчестер Сити" сафини тўлдирганди. Transfermarkt портали баҳосига кўра, футболчининг бозор нархи 20 миллион еврони ташкил этади.