Грузия президенти Европадан ёрдам сўрамоқда

Грузия президенти Саломе Зурабишвили Европа Иттифоқи давлатлари раҳбарларидан мамлакатда «хорижий агентлар» тўғрисидаги қонунни қабул қилиш билан боғлиқ вазият фонида Тбилисига ташриф буюришни сўради, деб ёзади "NewsGeorgia".

Зурабишвили Тбилисидаги қароргоҳида йиғилган Европа Иттифоқига аъзо давлатлар элчиларига тегишли сўров билан чиқди.

«Биз кескин вазиятдамиз ва сиз ҳамкорларимиз сифатида грузин халқи учун барқарорликни таъминлашда жуда муҳим роль ўйнашингиз керак... Шу даврда, май ойининг охиригача олий даражадаги ташрифлар амалга оширилишини сўрайман. Кейин биламан, европаликларнинг ўзлари учун сайловлар, Европарламент сайловлари билан боғлиқ муҳим давр келади ва америкалик дўстларимиз ҳам фаол сайлов даврини бошлайди», — деди Зурабишвили.

У «Грузин орзуси» асосчиси Бидзина Иванишвилининг яқинда қилган асосий нутқини «жуда провокацион» ва Ғарбдаги ҳамкорларга қарши қаратилган деб баҳолади.

Президент «хорижий агентлар» тўғрисидаги қонуннинг қайта бошланишини «зўравонлик» ва «Европа Иттифоқи эшиклари очиқлигини кўришдан хурсанд бўлган» одамларга қарши «провокация» деб атади.