Гонконг аэропортида юк самолёти учиш-қўниш йўлагидан чиқиб, денгизга тушиб кетди — Reuters

Агентликнинг хабар беришича, ҳодиса бугун, 20 октябр куни маҳаллий вақт билан соат 03:50 да содир бўлган. Самолёт Дубайдан учиб келган.

Flightradar24 хизматининг маълум қилишича, у Туркиянинг AirACT авиакомпаниясига тегишли Boeing 747 самолёти бўлиб, Emirates учун юк рейсини бажараётган эди. Дастлабки тахминларга кўра, самолёт ерусти транспорт воситаси билан тўқнашган.

Машина ичида бўлган икки киши дастлаб бедарак йўқолган деб эълон қилинган. Маълумотларга кўра, улардан бири ҳалок бўлган, иккинчиси эса оғир аҳволда шифохонага ётқизилган, аммо у ҳам кўп ўтмай вафот этган. Юк самолёти экипажи таркибидаги 4 киши жабрланмаган.