Ғарб Украинада учта мудофаа чизиғини ташкил этиш режасини муҳокама қилмоқда — Financial Times

Газетанинг манбаларига таяниб ёзишича, Украинанинг Ғарбдаги иттифоқчилари уруш тугаган тақдирда мамлакатни ҳимоя қилиш бўйича дастлабки режани ишлаб чиққан.

Мазкур режада Украинада учта мудофаа чизиғи кўзда тутилган:

◾️ Биринчи чизиқ — қуролсизлантирилган зона бўлиб, у Украина ва Россия келишуви асосида учинчи давлатлар тинчликпарвар кучлари томонидан патрул қилиниши мумкин;

◾️ Иккинчи чизиқ — Украинанинг NATO томонидан қуроллантирилган ва ўқитилган ҳарбий кучлари;

◾️ Учинчи чизиқ — Европанинг “тийиб турувчи кучлари” бўлиб, улар чегарадан узоқроқда жойлаштирилади. Ушбу кучларни АҚШ қўшинлари қўллаб-қувватлайди.

FT'нинг қайд этишича, АҚШ ҳукумати бир неча бор ўз ҳарбийларини Украинага юбормаслигини маълум қилган. Шу билан бирга, Вашингтон можаро тўхтатилганидан сўнг Украинага ҳаво ёрдами, ер усти радар тизимлари ва разведка маълумотларини тақдим этишга тайёрлигини билдирган.

"Қўшма Штатлар можародан кейинги даврда Европа бошчилигида Украина ҳаво мудофаа тизимини яратишда ҳам иштирок этишга тайёр", дея қўшимча қилди Financial Times .