Фридрих Мерц: "Европа мудофаа масалаларида АҚШга "қарам" эди"

Германия канцлери Фридрих Мерц АҚШнинг Европа ўз мудофааси ва хавфсизлигига жуда кам сармоя киритаётгани ҳақидаги айбловларига қўшилди.

Европа ҳисоботлар бюроси хабар беришича, у BBCга берган интервьюсида шундай деди.

"Биз ўзимиз кўпроқ қилишимиз кераклигини тушунамиз. Илгари биз ҳақиқатан ҳам қарам эдик", деди у. "АҚШ биздан кўпроқ ҳисса қўшишимизни сўрамоқда ва биз буни қиляпмиз."

Мерц АҚШ президенти Дональд Трамп билан аллақачон уч марта учрашганини ва улар яхши муносабатлар ўрнатганини айтди.

"Ўйлайманки, президент Трамп бизнинг фикримизга қўшилади; биз бу урушни тугатишга ҳаракат қилмоқдамиз" - деди у Россиянинг Украинага қарши уруши ҳақида гапирар экан.

Шунингдек, у саъй-ҳаракатларни мувофиқлаштириш учун ҳафтада бир марта хориждаги ҳамкасбига қўнғироқ қилишини таъкидлади. "Биринчи масала - Украинадаги уруш, иккинчиси - савдо баҳсларимиз ва тарифларимиз", - дея қўшимча қилди у.

Мерц сайловолди ташвиқоти пайтида Украинанинг ашаддий тарафдори бўлган ва Германиянинг Христиан Демократлар партиясини февраль ойида ғалаба қозонишидан бир неча ой олдин Киевга ташриф буюрган.

У, шунингдек, ғалабадан кейинги биринчи ҳафтада Буюк Британия бош вазири Кир Стармер ва Франция президенти Эммануэль Макрон билан бирдамлик намойиши сифатида Киевга борди.

"Биз жиддий таҳдидни кўряпмиз ва бу таҳдид Россия. Ва бу таҳдид нафақат Украинага қарши. Бу бизнинг тинчлигимиз, эркинлигимиз, Европанинг сиёсий тартибига таҳдид", - дея огоҳлантирди у.

Германия мудофаа харажатларини оширмоқда, чунки “у етарлича кучли эмас, армияси етарли эмас”, деди канцлер.

Уч мамлакат – Британия, Германия ва Франция Европанинг йирик давлатларининг Е3 деб номланган иттифоқини яратиш устида биргаликда ишламоқда, Мерц бу иттифоқ нафақат хавфсизлик ва ташқи сиёсат, балки иқтисодий ўсишга ҳам эътибор қаратишини айтди.