Француз депутати: Исламофобик ҳужумларнинг 70–80 фоизи ҳижобдаги аёлларга қаратилган

Париж — Франциянинг мухолиф «Бош егмас Франция» партияси депутати Эрсилия Судэ Миллий Ассамблеяда ҳижобдаги мусулмон аёлларга қарши исламофобик кампаниялар таъсирини ўрганадиган парламент комиссиясини тузишни таклиф қилди. Депутатнинг таъкидлашича, Францияда исламофобия узоқ ва узлуксиз давом этмоқда, айниқса, ҳижобдаги аёллар кўпроқ нишонга олинаётгани қайд этилди.

Судэ парламентда бундай комиссияни ташкил этиш учун барча имкониятлардан фойдаланишини, айниқса, сиёсий гуруҳини ишонтиришга ҳаракат қилишини маълум қилди. У ҳижобдаги аёллар дуч келаётган психология босимини очиб бериш ва уларнинг овозини эшитиш муҳимлигини таъкидлади.

Ички ишлар вазири Бруно Ретонинг сўнгги пайтларда спорт ва университетларда ҳижоб тақиқини кучайтириш ҳақидаги баёнотлари ҳам депутат сўзларида мисол қилинди. Шунингдек, 2025 йилда Франция Сенати спорт мусобақаларида ҳижоб тақиқланишини маъқуллади.

Францияда 2004 йилдан бошлаб давлат хизматчилари ва мактаб ўқувчилари учун ҳижоб тақиқи амал қилади, 2010 йили эса жамоат жойларида ниқоб кийиш ҳам тақиқланган. Ижтимоий муаммолар ва ҳуқуқий баҳслар давом этмоқда.

Европанинг Исламофобияга қарши кураш тармоғи (CCIE) ҳисоботига кўра, 2024 йилда исламофобик ҳужумларнинг 76 фоизи аёлларга қаратилган.

Депутат Судэ бу муаммо жамиятдаги «фашизация» кучайишига олиб келаётганини айтиб, исламофобияга қарши курашни кучайтириш зарурлигини таъкидлади.