Францияда электр тармоқларидаги қўпорувчилик юзасидан тергов олиб борилмоқда

Франция жанубидаги Алп денгизи департаментида кенг кўламли электр таъминоти узилишига сабаб бўлган энергетика объектларига қасддан зарар етказиш республика расмийлари ташаббуси билан тергов объектига айланди.

Бу ҳақда Франциянинг BFMTV телеканали суриштирувга яқин манбага таяниб хабар бермоқда.

Унинг сўзларига кўра, Вильнёв-Лубе коммунаси ҳудудидаги юқори кучланишли электр узатиш тармоғи пилонида номаълум шахс конструкциянинг темир тиргакларини кесиб ташлаган, шунингдек, асосдаги тўртта таянчдан учтасини арралаган.

Бунинг оқибатида устун жуда қийшайиб кетган ва 24 май куни эрталаб симлар узилган. Авария 160 минг хонадоннинг электр таъминотидан узилишига олиб келди.