Франция тинчлик йўлида эмас, балки "Россияга босимни кучайтириш йўлида турибди," деб таъкидлади Россия Федерацияси президентининг матбуот котиби Дмитрий Песков.
"Франция ҳамон Россиядан босим орқали нимадир қўлга киритиш мумкин деб ўйламоқда, бу эса мамлакатимиз моҳиятини мутлақо тушунмасликдан далолат беради," - деди Песков ва Франция президенти Эммануэл Макроннинг "ҳақиқий вазиятни англамаётганидан" афсусланганини билдирди.
Франция раҳбари бир неча бор Россияга босимни кучайтиришга даъват этган эди. 26 май куни у америкалик ҳамкасби Доналд Трампнинг Владимир Путинга нисбатан танқидий фикрларидан сўнг, бу "ғазаб"нинг "ҳаракатларга," хусусан, "анча кенг қамровли санкциялар пакети"га айланишига умид билдирганди.
Ўшанда АҚШ президенти Путин Украинада дронлар ва ракеталарни ишга солиб, "бутунлай ақлдан озганини" ва "беҳуда кўплаб одамларнинг жонига қасд қилаётганини" айтган эди. Бундан ташқари, у Москвага қарши санкциялар жорий этиш имкониятини кўриб чиқаётганини маълум қилганди.
