ФҚБ Трампнинг 80 ёшлик юбилейида ўтказилган UFC турнири вақтида Оқ уйга уюштирилиши режалаштирилган ҳужумнинг олдини олди

ФҚБ директори Кэш Пателнинг сўзларига кўра, идорага “UFC Freedom 250” турнирига бўлиши мумкин бўлган потенциал таҳдид ҳақида ҳали 10 июн куниёқ маълум бўлган. Тадбирнинг ўзи эса тўрт кундан кейин, Доналд Трампнинг туғилган кунида, Оқ уй майсазорида бўлиб ўтган. Турнирда президент ва мамлакатнинг бошқа расмий шахслари иштирок этган.

Қайд этилишича, мазкур таҳдиднинг олдини олиш бўйича бир нечта штатларда ўтказилган амалиёт давомида бир неча киши қўлга олинган.

Fox News манбаларига кўра, гумондорлар одамларни эвакуация қилишга ундаш орқали ваҳима уйғотиш ва уларга қарата ўт очиш мақсадида Оқ уйга қўшни бўлган биноларга дронлар орқали зарба беришни режалаштиришган. Кейинчалик гумондорлар Оқ уйга ҳужум қилмоқчи бўлишган. Ҳужумдан кўзланган мақсад “капиталистик элитани йўқ қилиш” бўлган.