Фицо: "Словакия Украинага бир тийин ҳам бермайди"

Словакия ҳукумати Украинага ҳарбий ёрдам учун "бир тийин ҳам ажратмасликка" қарор қилди. Бу ҳақда республика бош вазири Роберт Фицо ўзининг Facebook ижтимоий тармоғидаги саҳифасида хабар берди.

"Словакия Украинадаги бирор ҳарбий операцияда қатнашмайди ва унга ҳарбий ёрдам учун бир тийин ҳам ажратмайди," - дея ёзди у.

Шу билан бирга, ҳукумат раҳбари Украина ва Словакия ҳукуматларининг қўшма мажлисини ўтказишни таклиф этди. Фицонинг фикрича, бундай учрашувда асосий муҳокама мавзуси икки давлат учун фойдали бўлган лойиҳаларни амалга ошириш бўлиши мумкин.

Шунингдек, бош вазир Братиславанинг Украина ҳудуди орқали газ транзитини қайта тиклаш бўйича чоралар кўришни давом эттираётганини маълум қилди. У таъкидлаганидек, агар ёқилғи етказиб бериш тикланмаса, Европа мамлакатлари қайта рақобатбардош бўла олмайди.

Фицо бу маълумотларнинг барчасини Словакияда фаолият юритаётган Европа Иттифоқига аъзо давлатларнинг элчиларига етказганини қўшимча қилди. Шу мақсадда ҳукумат раҳбари хорижий дипломатлар билан учрашув ўтказди.