Федерал кучлар Миннесотада инсонларни ўлдириб, тартибсизлик келтириб чиқармоқда

Иммиграция хизмати агентлари ҳаракатлари сабаб АҚШнинг Миннеаполис шаҳрига штат Миллий гвардияси йўналтирилмоқда, шаҳарда иммиграция хизматлари икки одамни ўлдиргани учун намойишлар авж олган — The Insider.

Миннеаполис шаҳри жойлашган Миннесота штати губернатори Тим Уолц бу ҳақдаги қарор ўтган ҳафтадаёқ қабул қилинганини айтди. Унинг айтишича, вазият ёмонлашган тақдирда тезроқ жавоб қайтариш имконига эга бўлиш учун гвардия бўлинмалари штат ихтиёрида хизмат қилиш режимига ўтказилган.

Губернаторнинг сўзларига кўра, миллий гвардияни жойлаштириш Ҳеннепин округи шерифи идораси, Штат патрули ва бошқа идоралар билан мувофиқлашган ҳолда амалга оширилмоқда.

Шунингдек, Уолц Миннеаполисга иммиграция операцияларини ўтказиш учун келган федерал агентлар ҳаракатларини кескин танқид қилди. У 37 ёшли АҚШ фуқароси ва ветеранлар шифохонасида ишлаган тиббий ходим Алекс Преттининг ўлимига олиб келган отишма видеосини кўрганини айтди ва АҚШ Ички хавфсизлик вазирлигининг “марҳум қуролли қаршилик кўрсатгани” ҳақидаги расмий версияни “бемаънилик” деб атади.

"Федерал кучлар Миннесотада инсонларни ўлдириб, тартибсизлик келтириб чиқармоқда. Шунингдек, улар намойишчиларни кескин усуллар билан тарқатди, аҳолига нисбатан кўзни ёшлантирувчи газни аёвсиз қўллади ва кейин воқеа жойини тарк этди, оқибатда эса юзага келган муаммоларни бартараф этиш штат ва шаҳар ҳокимиятлари зиммасига тушмоқда", — дея норозилик билдирди Уолц.