Фақатгина «Реал» Роналдуни табрикламади

Пайшанба куни Криштиану Роналду ўзининг 41 ёшини нишонлади. Португалиялик юлдуз уч йилдан бери шарафини ҳимоя қилаётган «Ан-Наср» клуби уни фақат кечқурун табриклади. Унинг собиқ клублари — «Манчестер Юнайтед», «Спортинг» ва «Ювентус» эса табрик хабарларини эрталаб ёки кундузи эълон қилишди. Фақатгина бир клуб Криштиануни оммавий равишда табрикламасликка қарор қилди.

Сиз аллақачон англаганингиздек, бу клуб — «Реал Мадрид». Мадрид клубининг ижтимоий тармоқлардаги саҳифаларида Роналдуга аталган табриклар пайдо бўлмади.

Таъкидлаш жоизки, «Реал» саҳифаларидаги бошқа постлар остида мухлислар кун давомида Роналду табрикланмагани учун ўз норозиликларини ва ғазабларини изҳор қилишди.

Криштиану Роналду 2009–2018 йилларда «Реал»да тўп сурган. Ушбу даврда португалиялик 438 та ўйинда майдонга тушиб, 450 та гол ва 131 та голли узатмага муаллифлик қилган.