Трамп жаннатга боришни исташини айтди

АҚШ президенти Доналд Трамп ўзини идеал номзод деб ҳисобламасада, жаннатга боришга умид қилаётганини билдирди. У бу ҳақда Вашингтонда бўлиб ўтган Миллий ибодат нонуштасида сўзлади. Нутқ Оқ уйнинг YouTube канали орқали жонли эфирда намойиш этилди.

«Аслида, мен жаннатга кетаётган бўлишим мумкин деб ўйлайман. Мен идеал номзод эмасман, аммо идеал одамлар учун жуда кўп яхшилик қилганман», — деб ҳазил қилди Трамп.

Шунингдек, у оммавий ахборот воситаларини унинг жаннат ҳақидаги аввалги ҳазилини нотўғри талқин қилгани учун танқид қилди. Президентнинг айтишича, у ҳазил қилмоқчи бўлган, аммо журналистлар буни ҳаёт маъноси ҳақидаги жиддий мулоҳаза сифатида кўрсатган. Трамп журналистлар билан кинояли муносабатда бўлиш эҳтиёткорликни талаб қилишини ҳам таъкидлади.