Ўзбекистон бўйлаб қатор савдо марказлари ёпилди

Республика бўйича ФВВ ва бошқа идоралар томонидан ўтказилган текширувларда ёнғин хавфсизлиги талабларини қўпол равишда бузган савдо ва кўнгилочар объектлар аниқланди. Камчиликлар бартараф этилгунига қадар уларнинг фаолияти вақтинчалик тўхтатилди.

Жумладан:
— Бухоро вилоятида бир қатор савдо мажмуалари, болалар ўйингоҳи павилиони, бинолар ва хоналар ёпилди;
— Жиззах шаҳрида савдо марказининг умумий овқатланиш шохобчаси фаолияти тўхтатилди;
— Сирдарё вилояти, Гулистон шаҳрида савдо маркази ертўласидаги омборхона ёпилди;
— Термиз шаҳрида “Инденим” савдо-кўнгилочар маркази вақтинча фаолиятдан тўхтатилди.

Текширувлар автоматик ёнғин ўчириш тизимлари, эвакуация йўлаклари ва ёнғинга қарши воситалар ҳолатини қамраб олмоқда.

Эслатиб ўтамиз, 31 январ куни “Aviator” савдо мажмуасидаги ёнғинда 1 киши ҳалок бўлганидан сўнг бундай текширувлар кучайтирилган.