Европарламент Еврокомиссиясининг янги таркибини тасдиқлади

Бугун Страсбург шаҳрида бўлиб ўтган Европарламентнинг кўчма сессияси чоғида унинг президенти Урсула фон дер Ляйеннинг иккинчи мандати даврида Еврокомиссиянинг янги таркиби тасдиқланди.

Таркибни 370 киши қўллаб-қувватлади, 282 киши қарши овоз берди, 36 депутат бетараф қолди.

Овоз беришдан олдин У.Ляйен ўз жамоаси ва дастури билан таништирди.

“Биз зудлик билан иш бошлашга тайёрмиз”, – деди У.Ляйен ва у раҳбарлик қилаётган комиссия ҳамиша озодлик, суверенитет, хавфсизлик ва фаровонлик учун курашга содиқ бўлишини таъкидлади.

У.Ляйен Европа Комиссиясининг биринчи ташаббуси Европанинг АҚШ ва Хитой билан инновацион фарқини камайтириш, хавфсизлик ва мустақилликни ошириш ҳамда карбонсизланишни таъминлашга қаратилган “Рақобатбардошлик компаси” бўлишини маълум қилди.

Европанинг “яшил келишуви” ҳақида гапирар экан, у шундай деди: “Биз унинг мақсадларига эришиш йўлда қолишимиз керак ва биз шундай қиламиз”.

У яшил саноат келишувини амалга ошириш, Европа автомобилсозлик саноати келажаги бўйича стратегик мулоқотни йўлга қўйиш ва рақобатбардош айланма иқтисодиёт ва Европа жамғарма ва инвестициялар иттифоқи йўлида ишлашни давом эттириш тарафдори.

У.Ляйен дунёда рўй бераётган зиддиятлар ҳақида гапирар экан, “Европа бу соҳаларнинг барчасида фаолроқ рол ўйнаши керак” ва бу “ҳар қачонгидан ҳам зарур” эканини таъкидлади.

“Хавфсизлигимизни мустаҳкамлаш жуда муҳим”, – деди у ва Европани мудофаа учун кўпроқ маблағ сарфлашга чақирди.

“Европа хавфсизлиги ҳар доим ушбу Комиссия учун устувор масала бўлиб қолади”, – дея қўшимча қилди у.

У.Ляйен ва унинг янги жамоаси билан муҳокамалардан сўнг Европарламент депутатлари Комиссарлар кенгашини сайладилар.

Жорий йилнинг 1 декабридан Комиссарлар кенгаши ўз фаолиятини бошлаши кутилмоқда. Европарламент аъзолари Европа комиссиясининг келгуси беш йил ичида мажбуриятлари бажарилишини назорат қилади.