Европа разведкаси Россиянинг музокаралардаги эҳтимолий талабларини ўз ичига олган ҳужжатни қўлга киритди

Улар орасида “Киев режимини йўқ қилиш қилиш” ҳам бор.

Нашрнинг ёзишича, Европа давлатларидан бирининг разведкаси томонидан қўлга киритилган ҳужжат 18 феврал куни Ар-Риёдда Россия ва АҚШ ўртасида ўтказилган музокаралардан олдин Кремл учун тайёрланган. Бу ҳужжат Россия Федерал хавфсизлик хизматининг Украинадаги операцияларини назорат қилувчи Бешинчи хизмати билан яқин ҳамкорлик қилувчи таҳлилий марказ томонидан ишлаб чиқилган.

Мазкур ҳужжатда Қўшма Штатлар президенти Доналд Трампнинг “100 кун ичида тинчликка эришиш” режаси “амалга ошмайдиган” деб баҳоланган, Украина инқирозини тинч йўл билан ҳал қилиш эса “2026 йилгача имконсиз” деб топилган.

Муаллифларнинг фикрига кўра, Украинанинг босиб олинган ҳудудлари Россия таркибидаги суверен ҳудуд сифатида тан олинмаса, уруш қайта бошланиши мумкин. Ҳужжатда нафақат босиб олинган ҳудудларни Россиянинг суверенитети сифатида тан олиш, балки Украинанинг Брянск ва Белгород вилоятлари билан чегарадош ҳудудида хавфсизлик зонасини, шунингдек, Қримга яқин жанубий вилоятларда, жумладан, Одесса вилоятини ҳам ўз ичига олувчи демилитаризация зонасини яратиш талаб қилинган.

Украинанинг эҳтимолий ён беришлари, масалан, NATO'га аъзо бўлишдан воз кечиш ва россияпараст партиялар иштирокидаги сайловлар ўтказишга розилик каби таклифлар етарли эмас деб топилган.

"Аслида, ҳозирги Киев режими мамлакат ичидан ўзгартириб бўлмайди. Уни тўлиқ йўқ қилиш зарур", дея ҳужжатдан иқтибос келтиради Тhe Washington Post.

"Украинада ҳар қандай тинчликпарвар кучлар, ҳатто Европага тегишли бўлмаганларини жойлаштириш ҳам кераксиз ҳисoбланади, чунки улар Ғарб таъсирига жуда кучли мойил бўлади", дея қайд этилган Россиянинг режасида.

Россия президенти матбуот котиби Дмитрий Песков WP'га берган изоҳида "бундай тавсиялардан хабари йўқлигини" ва Кремл "яхшилаб ўйланган вариантлар" устида ишлаётганини айтди.

"Москванинг феврал охиридаги айрим ҳаракатлари ҳужжатдаги таклифларга мувофиқ келмоқда. 24 феврал куни Путин АҚШга Украинанинг босиб олинган ҳудудларидаги нодир металл конларини биргаликда ўзлаштиришни таклиф қилди. Трамп маъмурияти вакиллари билан дастлабки учрашувларда эса Россия дипломатик инфратузилмани тиклашга эътибор қаратди", деб ёзади нашр.