Европа Иттифоқининг Россияга қарши санкцияларининг 18-пакетига нималар киради?

Сешанба куни Еврокомиссия Европа Иттифоқининг Россияга қарши санкцияларининг 18-пакети лойиҳасини тақдим этди. Чекловлар энергетика сектори, банк тизими ва мудофаа саноатида фойдаланиладиган маҳсулотлар экспортига тегишли. Бу таклиф 10-июн куни Брюсселда Европа комиссияси президенти Урсула фон дер Ляйен томонидан билдирилган.

Янги пакет Россия банклари ва энергетика компаниялари учун чекловларга қаратилган, деди у, шунингдек, экспорт устидан назоратни кучайтириш ва санкцияларни четлаб ўтишга қарши курашни ўз ичига олади.

🗣 " Биз биринчи марта "Шимолий оқим 1" ва "Шимолий оқим 2" бўйича транзакцияни тақиқлашни таклиф қилмоқдамиз. Бу шуни англатадики, ҳеч бир Европа Иттифоқи оператори "Шимолий оқим" қувурлари бўйича ҳар қандай транзакцияда тўғридан-тўғри ёки билвосита иштирок эта олмайди. Ўтмишга қайтишнинг иложи йўқ ", деди фон дер Ляйен.

❕ Янги пакетнинг асосий элементларидан бири нефт нархининг юқори чегарасини бир баррел учун 60 доллардан 45 долларга туширишдир.

" Нефт экспорти ҳамон Россия давлат даромадларининг учдан бир қисмини ташкил этади. Биз бу даромад манбасини қисқартиришимиз керак ", - дея тушунтирди Еврокомиссия раҳбари.

Унинг қўшимча қилишича, нефт нархини чеклаш G7 давлатларининг умумий сиёсатининг бир қисмидир. Келгуси ҳафта Канададаги саммитда бу масала муҳокама қилинади.

Нархлар чегарасига риоя этилиши устидан назоратни кучайтириш учун Еврокомиссия Россиянинг “соя флоти”да фойдаланиладиган яна 77 та кемага нисбатан санкциялар жорий этишни таклиф қилмоқда . Ҳозирда 342 та бундай кема санкциялар остида. Шунингдек, Россия нефтидан ишлаб чиқарилган нефт маҳсулотларини импорт қилишни тақиқлаш таклиф қилинмоқда.

▪️ Санкцияларнинг иккинчи блоки банк секторига тегишли.
Россия банкларининг нафақат молиялаштиришни жалб қилиш имкониятларини чеклаш, балки уларга операцияларни амалга оширишни бутунлай тақиқлаш таклиф қилинмоқда. Ушбу тақиқни яна 22 Россия банкига узайтириш таклиф қилинмоқда.

Бундан ташқари, Европа Комиссияси ушбу чекловларни санкциялардан бўйин товлаш схемаларида иштирок этаётган учинчи давлатларнинг молиявий операторларига ҳам жорий қилмоқчи. Шунингдек, Россия тўғридан-тўғри инвестиция жамғармаси, унинг шўба корхоналари ва лойиҳаларига қарши ҳам санкциялар таклиф этилмоқда.

▪️ Учинчи нуқта - 2,5 миллиард евродан ортиқ экспорт тақиқлари.
" Биз машинасозлик, металл, пластмасса ва кимёвий маҳсулотларни нишонга оламиз. Улар саноатда хомашё сифатида ишлатилади. Шунингдек, биз учувчисиз самолётлар, ракеталар ва бошқа қуролларни ишлаб чиқаришда қўлланиладиган икки мақсадли маҳсулот ва технологиялар экспортини чеклаяпмиз. Биз Россия қуролларини Европа технологиялари ҳисобига модернизация қилмаслигига ишонч ҳосил қилмоқчимиз ", - деди фон дер Леен.

▪️ Тўртинчи блок - мавжуд транзакция чекловларини кенгайтириш.
Россия ҳарбий-саноат комплексини қўллаб-қувватловчи яна 22 та Россия ва хорижий компанияларни санкциялар рўйхатига киритиш таклиф қилинмоқда.

" (Россия президенти Владимир) Путиннинг урушни давом эттира олиши кўп жиҳатдан у учинчи давлатлардан оладиган қўллаб-қувватлашга боғлиқ. Россия урушини ва Украинани босиб олиш саъй-ҳаракатларини қўллаб-қувватлаганлар зиммасига катта масъулият юкланади ”, деди Еврокомиссия раҳбари.

Эслатиб ўтамиз, ЕИнинг Россияга қарши олдинги, 17-санкция пакети 20-май куни тасдиқланган эди. Унда кимёвий қурол қўллаш ҳамда ЕИ давлатлари ва уларнинг ҳамкорларида беқарорлаштирувчи ҳаракатлар учун чекловлар киритилган эди.