Европа АҚШга қарши савдо жарима чораларини тайёрламоқда

Европа Иттифоқи АҚШ президенти Дональд Трампнинг тариф сиёсатини жавобсиз қолдирмаслик учун АҚШ маҳсулотларига янги бож солиқлари жорий этилиши мумкин бўлган товарлар рўйхатини тузди. Бу ҳақда Politico нашри хабар берди.

Пайшанба куни Европа комиссияси АҚШ томонидан деярли 100 миллиард еврога тенг импорт маҳсулотларига қўйилган божларга жавоб тариқасида чоралар таклиф қилди. Рўйхатга самолётлар, автомобиллар, тиббий жиҳозлар, кимёвий моддалар, пластмасса, шунингдек, «бурбон» ва бошқа спиртли ичимликлар киритилган. Илгарироқ Франция ва Италия алкоголли маҳсулотларни рўйхатга киритишга қарши чиққанди, аммо комиссия ўз позициясида турди.

Нашр маълумотига кўра, ушбу ҳужжат 200 бетдан ортиқни ташкил этади ва 4800 дан зиёд товар турларини қамраб олади. 2024 йилда ушбу товарларнинг Европа Иттифоқига импорти умумий 109 миллиард еврога тенг бўлган. ЕИ шунингдек, 4,4 миллиард евро қийматдаги металл хомашёси ва кимёвий маҳсулотлар экспортини чеклаш имконини ҳам кўриб чиқмоқда.

Бу билан бирга, Брюссель ВТО (Жаҳон савдо ташкилоти)га АҚШнинг автомобилларга жорий этган ўзаро бож ва чекловлари юзасидан даъво тайёрламоқда. Бироқ Европа Иттифоқининг асосий мақсади — музокаралар ўтказиш. Европа Комиссияси раҳбари Урсула фон дер Ляйеннинг таъкидлашича, бизнес ва ЕИга аъзо давлатлар билан маслаҳатлар 10 июнгача давом этади.

АҚШ аввал Европа Иттифоқидан деярли барча экспорт маҳсулотларига 20% қўшимча бож жорий қилган, кейинчалик буни 90 кунга 10%гача пасайтирган. Бироқ металл, алюминий ва автомобилларга бўлган божлар ўз кучида қолмоқда. Европа Иттифоқи ўз навбатида 21 миллиард еврога тенг жавоб чораларини — Harley-Davidson мотоцикллари, парранда гўшти ва кийим-кечак каби маҳсулотларга бож жорий қилишни — вақтинча тўхтатган.

Оммавий ахборот воситалари баҳосига кўра, Вашингтоннинг савдо сиёсати Европа Иттифоқининг АҚШга экспорт қилувчи маҳсулотларининг тахминан 97%ига таъсир кўрсатмоқда. Брюссель жавоб чораларини НАТОнинг июнь ойида Гаагада бўлиб ўтадиган саммитига қадар кечиктириши мумкин. Бу эса ушбу тадбир арафасида кескинликни кучайтирмаслик учун амалга оширилиши мумкин.