Евроиттифоқ Маскка тегишли Х ижтимоий тармоғига йирик жарима солмоқчи

Евроиттифоқ Маскка тегишли Х ижтимоий тармоғига ноқонуний контент ва дезинформацияга қарши курашиш тўғрисидаги қонунни бузганлик учун йирик жарима солиши мумкин, деб хабар бермоқда The New York Times.

Нашрнинг таъкидлашича, бу қадам Европа Иттифоқи ва Қўшма Штатлар ўртасидаги муносабатлардаги тарангликни кучайтириши мумкин, чунки Илон Маск АҚШ президенти Доналд Трампнинг энг яқин тарафдорларидан бири ҳисобланади.

Манбаларга кўра, таклиф этилаётган чоралар қаторида жарима ва хизматда ўзгаришлар киритиш талаби мавжуд. Уларнинг айтишича, санкциялар шу йил ёзда эълон қилиниши мумкин.

Ҳозирда Европа Иттифоқи расмийлари Х ижтимоий тармоғига қандай ҳажмдаги жарима қўлланиши кераклигини ўйлаб кўришмоқда. NYT суҳбатдошларидан бирининг сўзларига кўра, жарима суммаси бир миллиард доллардан ошиши мумкин. Регуляторлар шу йўл билан бошқа компанияларга ибрат кўрсатмоқчи ва Рақамли хизматлар тўғрисидаги қонунни бузишдан қайтаришни мақсад қилган.

Тергов 2023 йилда бошланган ва ўтган йили регуляторлар Х тармоғи қонунни бузганига доир дастлабки хулосани чиқарган, деб ёзади нашр. Шунга қарамай, амалдорларнинг айтишича, Европа ҳукумати ва Х агар компания зарур ўзгаришларга рози бўлса, келишувга эришиши мумкин.

"Биз ҳар доим ва бундан кейин ҳам Европа Иттифоқида фаолият юритаётган барча компанияларга нисбатан қонунларни адолатли ва камситмасдан қўллаймиз, бу халқаро меъёрларга тўла мос келади", — деди Еврокомиссия вакили, бироқ Х билан боғлиқ ҳолат юзасидан аниқ изоҳ бермади. Ижтимоий тармоқ вакиллари эса изоҳ беришдан бош тортган, деб ёзади NYT.