Эрондан Трампга кескин баёнот: "Қўлингдан келганини қил!"

Эрон президенти Масъуд Пезешкиан таҳдидлар остида АҚШ билан музокараларни рад этди.

Эрон президенти Масъуд Пезешкиан таҳдидлар остида АҚШ билан музокараларни рад этиб, президент Доналд Трампга "Қўлингдан келганини қил" дея мурожаат қилди. Бу ҳақда Эрон давлат оммавий ахборот воситалари хабар бермоқда.

Шунингдек, у яқинда Трамп ва Украина президенти Володимир Зеленский ўртасидаги Оқ уй Овал кабинетидаги тўқнашувга ишора қилиб, АҚШ ташқи сиёсатини танқид қилди. "Яқинда Зеленскийга қилган муомалангиздан сўнг ўзингиздан уялишингиз керак," деди Пезешкиан сешанба куни кечқурунги нутқида.

Эрон ва АҚШ ўртасидаги муносабатлар кескинлигича қолмоқда. Вашингтон Теҳронни янги ядро келишувига мажбурлашга уринмоқда. Трамп ўз маъмуриятининг Эронни иқтисодий жиҳатдан издан чиқаришга қаратилган "максимал босим" стратегиясини қайта жорий этди, шу билан бирга Эронга ҳарбий ҳаракатлар билан таҳдид солмоқда.

Теҳрон узоқ вақтдан бери ўзининг ядро дастури тинч мақсадларга йўналтирилганини таъкидлаб келмоқда.

Пезешкиан Теҳрон Вашингтон томонидан қўйиладиган талабларни қабул қилмаслигини аниқ-равшан баён этди. "АҚШ бизга буйруқ бериб, таҳдид қилиши биз учун мутлақо қабул қилиб бўлмайди. Мен сизлар билан ҳатто музокара ҳам қилмайман. Нимани хоҳласангиз, шуни қилаверинг," дея унинг сўзларини давлат оммавий ахборот воситалари келтирди. Бироқ, у яна шуни ҳам қўшимча қилдики, "агар музокаралар қадр-қиммат билан, ўзаро ҳурмат ва умумий манфаатларга асосланиб олиб борилса, биз ўтириб суҳбатлашишга тайёрмиз."