Бу ҳақда NBC News телеканалига Эрон олий раҳбарининг бош маслаҳатчиси Али Шамхоний баёнот берди.
Унинг сўзларига кўра, Эрон санкцияларнинг бекор қилиниши эвазига ядро қуроли ишлаб чиқармаслик мажбуриятини олади, юқори даражада бойитилган уран захираларидан воз кечади, уранни фақат фуқаролик мақсадлар учун зарур бўлган паст даражаларгача бойитишга рози бўлади ва бу жараённи халқаро инспекторлар назорат қилишига рухсат беради.
"Шу билан бирга, Трамп Эрондан ҳатто фуқаролик эҳтиёжлари учун ҳам уран бойитмасликни ва ядровий ёқилғини импорт қилишни талаб қилмоқда. Бироқ Теҳрон бу борада муроса қилишни истамаяпти", дея ёзмоқда NBC News.
Эрон ташқи ишлар вазири Аббос Ароқчининг сўзларига кўра, уранни бойитиш – Эрон ҳеч қачон воз кечмайдиган масала, бу ерда келишувга ўрин йўқ.
"Бироқ унинг миқёси, даражаси ёки ҳажми ишончни мустаҳкамлаш мақсадида маълум муддатга ўзгариши мумкин", – дея қўшимча қилди вазир.
Аввалроқ Қўшма Штатлар президенти Доналд Трамп бошқа давлатларга Эрон нефтини сотиб олгани учун иккиламчи санкциялар жорий қилиш билан таҳдид қилган эди.
