Эрон билан уруш сабаб АҚШ ҳарбий хизматчиларининг армияни тарк этиш истаги кучаймоқда

Эронга қарши ҳарбий операцияларда иштирок этган айрим америкалик ҳарбий хизматчилар урушнинг мақсадлари, тинч аҳоли орасидаги қурбонлар ва халқаро ҳуқуқ билан боғлиқ масалалардан хавотир билдириб, ҳарбий хизматдан виждонан воз кечиш учун ариза бермоқда. Бу ҳақда Tasnim News хабар берди.

MS NOW телеканали маълумотларига кўра, Эронга қарши зарбалардан кейин ҳарбий хизматдан виждонан воз кечиш мақомини олиш бўйича мурожаатлар кескин кўпайган. Телеканал ариза бериш жараёнини бошлаган беш нафар америкалик ҳарбий хизматчи билан суҳбатлашган.

Улардан бири Эрондаги айрим кўприкларнинг вайрон қилиниши юзасидан хавотир билдирган. Унинг фикрича, ушбу объектлар ҳарбий нишон бўлмаган бўлиши мумкин. Яна бир ҳарбий хизматчи АҚШ ҳарбий раҳбарияти Эрон ҳудудига ҳаво зарбалари чоғида тинч аҳоли қурбон бўлишининг олдини олиш учун етарлича чора кўрмаётганини таъкидлаган.

Бошқа бир хизматчи эса наркотиклар контрабандасида гумон қилинган қайиқларга ракета зарбалари берилганда, улардаги одамлар ҳақиқатан ҳам ҳарбий нишон эканига қандай ишонч ҳосил қилинаётганини савол остига қўйган.

Эрон билан уруш бошланганидан кейин ҳарбий хизматдан виждонан воз кечиш масаласида ёрдам берувчи икки ташкилот мурожаатлар сони сезиларли даражада ошганини билдирган.

Виждон ва уруш маркази ишонч телефони ходими Майк Приснернинг айтишича, Эронга қарши уруш бошланганидан бери ташкилотга келиб тушаётган қўнғироқлар одатдагидан олти баробар кўпайган. Унинг маълум қилишича, ташкилот одатда бир йилда тахминан 50 нафар мурожаатчи билан ишласа, уруш бошланганидан буён қарийб 140 нафар ҳарбий хизматчи мурожаат қилган.

Приснернинг таъкидлашича, ҳозирги мурожаатчилар орасида ўн йилдан ортиқ хизмат қилган ҳарбийлар, офицерлар ва турли юқори унвондаги хизматчилар ҳам бор.

Унинг сўзларига кўра, мурожаат қилганларнинг аксарияти ўз ҳаёти учун қўрққани сабабли эмас, балки урушда иштирок этишнинг ахлоқий ва ҳуқуқий оқибатларидан хавотирлангани учун хизматни тарк этишни истамоқда.

Шунингдек, Quaker House ҳарбий-ҳуқуқий линияси ҳам Эрон билан можаро бошланганидан кейин виждонан воз кечиш мақомини олиш бўйича мурожаатлар кўпайганини маълум қилди. Ташкилот март ойида 429 та, апрель ойида эса 440 та мурожаат олган. Кейинги ойларда ҳам мурожаатлар одатдагидан юқори даражада сақланиб қолган.

Ташкилот маслаҳатчиси Ленор Яргернинг маълум қилишича, ҳозир улар виждонан ҳарбий хизматдан воз кечишни истаган тахминан 30 нафар киши билан ишламоқда. Урушдан олдин бу кўрсаткич одатда 5–10 нафарни ташкил этган.

Мурожаат қилган ҳарбий хизматчиларнинг айтишича, улар армияга қўшилган пайтда уруш фақат миллий мудофаа учун ва бошқа чора қолмаган ҳолларда қўлланиши керак, деб ҳисоблаган. Бироқ АҚШнинг ҳарбий операциялари сабаблари, тинч аҳоли орасидаги қурбонлар ва уруш усуллари борасидаги хавотирлар уларнинг қарашларини ўзгартирган.

Улар энди ўз эътиқодларига зид деб ҳисоблаган ҳарбий операцияларда иштирок этишни истамаётганини билдирган.