Эрдоған Трамп билан музокара ўтказди: Эрон билан сулҳ имконияти муҳокама қилинди

Туркия президенти Режеп Таййип Эрдоған АҚШ президенти Дональд Трамп билан телефон орқали мулоқот қилди.

Туркия президенти ҳузуридаги Коммуникациялар бошқармаси маълумотига кўра, суҳбат чоғида етакчилар минтақадаги долзарб воқеаларни, хусусан 8 апрель куни кечқурун эълон қилинган Эрон билан ўт очишни тўхтатиш келишувини муҳокама қилди.

Эрдоған сулҳ эълон қилинганидан мамнунлигини билдириб, сўнгги 40 кун бутун дунё учун жуда оғир ва мураккаб бўлганини таъкидлади. Унинг сўзларига кўра, юзага келган икки ҳафталик имконият ойнасидан самарали фойдаланиб, мустаҳкам тинчлик келишувига эришиш ва бу жараённи издан чиқаришга йўл қўймаслик муҳим.

Шунингдек, Эрдоған Туркия бундан буён ҳам можарони тинч йўл билан ҳал этиш бўйича саъй-ҳаракатларни қўллаб-қувватлашини, бу борада дўст ва биродар давлатлар, аввало Покистон билан ҳамкорликни янада кучайтиришини қайд этди.